孫興四月中喺北京涉毒被捕，五月初獲釋後，一直休息至今。早排孫興同四川籍女友駱莉娜去三亞旅行，近日就移師北京、杭州同深圳等地繼續玩。打通咗互聯網任篤二脈嘅微博，就透過各地網民貼相，揭露孫興放浪形骸嘅夜蒲生活。
47歲嘅孫興以中坑潮look穿梭神州，有位網友將佢同孫興玩到癲嘅唱K相放上微博，相中孫興戴螢光蝴蝶頭箍做咪霸，仲將大髀擱到男友人身上，睇表情就知佢超high。上星期孫興去咗杭州先後出席友人飯局兼蒲吧捽碟，當日佢戴帽、圍上紅領巾，着住印有Superman圖案嘅T恤，仲喺酒吧孔雀開屏攬女合照，煙酒齊飛，顯然上次喺北京食食吓飯涉毒被拉一事，對佢夜蒲係零陰影。
之後孫興上京再玩，揸新車相約朋友聚餐煲煙隊啤；前幾日佢又現身深圳，同班亞視舊友姜皓文（黑仔）同劉錫賢等出席剪綵活動及飯局，席間孫興又咪霸上身，影大合照時仲下體激凸，相當騎呢。
片約不斷
黑仔噚日喺電話中大讚孫興：「佢未開工，好似話有幾部電影準備開，佢跟住會去日本，傾緊部日本電影。佢個人好正常，OK到不得了。」黑仔話駱莉娜今次冇做跟得女友，但講到孫興夜蒲爛玩，黑仔就唔擔心：「佢去嗰啲唔係咁公開嘅地方，幾秘密，唔會黐到出面嘅人，好安全，睇落似夜店，其實係朋友屋企嘅裝修。」講到孫興攬女，黑仔大笑話：「係咩？攬到好實呀？玩得咁瘋狂？」
