彭定康會在十月底來港為小朋友講故事，為牛津出版社（香港）慶祝五十周年嘅重頭節目，順便推銷牛津幼兒學英語嘅新書及為牛津大學籌款。牛津出版社可能係牛津大學系統內嘅一隻肥牛，可以榨出牛奶嘅。
據彭博社七月六日報道，牛津大學校長（ViceChancellor）韓美頓（AndrewHamilton）已從出版社嘅儲備抽出二億英鎊，撥入牛津嘅留本基金（endowmentfund），希望每年孳息七百萬鎊，其中一半用作學生獎學金。牛津出版社創於1586年，有425年歷史，積積埋埋唔少銀両，大學總部當然吼實呢隻肥牛。
點解要向出版社伸手呢？牛津大學在在需財吖嘛。現任校長韓美頓本是劍橋博士、普林斯頓化學教授、耶魯大學常務副校長（Provost），返回英國接管牛津後就大力引入美國私立大學嘅籌款文化，用齊美式招數。話時話，耶魯盛產校長，過往嘅Provost之中，已有AlisonRichard做過劍橋大學校長，及SusanHockfield現任麻省理工校長。
韓美頓為牛津定下籌款目標，籌集十二億五千萬鎊，由2008至今，已籌得十億鎊，從哈佛大學商學院挖走校友事務處長掌管牛津校友事務向校友勸捐，過去只有15%牛津校友捐錢俾母校，而哈佛有19%，達茅夫學院有44%，牛津及所有書院之留本基金加埋只有二十三億三千萬英鎊，與哈佛耶魯冇得比，哈佛有二百七十四億美元，耶魯有一百六十七億美元。
牛津有近千年歷史，從來收低學費，靠英國政府撥款資助，碰啱近年來英國政府莫財，政府要大學加學費，減支出，減資助，到2015年總共削資二十億鎊，單係牛津就由2012開始每年每位學生收少津貼四千七百鎊，故此牛津不得不自己搵錢，全面採用美國方式籌款，以免陷入財政困難或喪失與哈佛耶魯競爭嘅能力。世界上還有一批歐洲左翼學生，以為錢係天跌落嚟嘅，極力反對歐洲大學私校化以及營運/籌款比較商業化，反對加學費，繼續要政府撥巨款。韓美頓呢位英國學者去咗美國二十幾年，返到英國牛津就大事籌款美國化，搵到錢唔駛大力裁員減薪，現在仍然幾受牛津教授歡迎噃！