張達明的棟篤笑《一於做壞蛋》於年初在伊館上演時口碑不絕，令《一》得以於本月尾在紅館重演，達Ming不諱言會把至hit時事放入騷中，更表示：「呢個世界真係好多壞人，因為連老公都可以唔係好人嘅！」將鋒芝婚變話題擺上枱！採訪：文國駿 攝影：葉君海
張達明日前在尖沙嘴接受訪問，宣傳將於月尾在紅館重演的棟篤笑《一於做壞蛋》，問到他何解這次的棟篤笑以壞蛋作主題及會否令題材更加兒童不宜？
達Ming笑言：「兒童不宜就一向都係o架啦！之前嗰啲都係十歲以下唔好入場，其實係咪兒童不宜係睇吓隔籬有冇大人講解，好似早輪有本內含粗口嘅兒童讀物喺外國有售咪一樣咁賣得！至於用壞蛋做題材，係因為我覺得好有發揮，其實壞蛋呢個形容好踩界，好似示威者阻街示威好似係壞蛋，但佢為民主發聲又好英雄喎；而又有句『我老公唔係好人』，原來連婚姻都可以有壞蛋嘅，所以係兩睇嘅，想同觀眾探討吓，笑吓。」
一句「我老公唔係好人」，擺明將鋒芝婚變搬上舞台作話題，達Ming直認不諱：「我係會將所有hit嘅題材放入去，唔止鋒芝，仲好似孕婦想生仔冇得生；林瑞麟講遞補機制咁，不過呢啲仲構思緊，可能到時有其他嘢仲爆、仲有迴響呢！」
願望上京開騷
對於踏足紅館，達Ming坦言有少少緊張，但絕不會是其最大目標，他說：「其實都係興奮嘅，當係我入行十五年嘅一張成績單！不過我最希望都係去到北京大劇院做騷，不過好難，一係因為普通話問題，二係題材要審批。」
場地提供：煌府婚宴專門店