造物者最美好嘅安排，就係畀人有選擇自由；同時亦創造咗人類有唔同膚色和特徵。好似有人覺得瑪莉蓮夢露索，亦有人認為唐貴妃無得頂，總之燕瘦環肥各有喜好！星期三舉行嘅年度ESPY頒發典禮，儘管有一班型男索女撐場，但係「爆乳」造型嘅美國網球手莎蓮娜，一亮相就搶晒頒獎禮大贏家達拉斯小馬嘅風頭！
滑雪天后禾恩膺全年最佳
ESPY獎項由ESPN所創立，為表揚過去一年喺體壇有卓越成績嘅運動員。頒獎典禮因為喺洛杉磯舉行，所以雲集唔少荷李活巨星，現場星光熠熠，好似美國網球員盧迪克嘅索模老婆迪嘉都有嚟捧場。
咁大嘅體壇盛事，一班猛人好似紐約人前鋒A史杜達米亞、花樣滑冰靚女莉比絲姬、滑浪天后比漢妮咸姆頓都親臨會場。講到最吸引人嘅，當然係網壇美女舒拉寶娃，佢高䠷嘅身材配合束起嘅長長金髮，加埋件露肩百褶短裙，回眸一笑擺甫士影相，睇相真係飲得杯落。
同樣以一頭長長金髮示人嘅美國滑雪女王禾恩，呢條金色珠片短裙美艷動人，落咁重本當然有獎攞，獲選年度最佳女運動員，唔怪得笑得咁甜啦。
達拉斯小馬成大贏家
面對靚爆鏡嘅舒娃同禾恩，網壇前「1姐」莎蓮娜都唔輸蝕，佢一頭黑色曲髮、再配窄身紅色低胸短裙，狂拋36D巨咪，一亮相即搶咗唔少風頭；最頂癮係細威回眸一笑，連我求大俠閱女無數都頂唔住，噴咗兩啖血出嚟。
細威自從上年贏溫網後，因傷一直冇參賽，之不過喺2010年兩奪大滿貫，仍然無阻佢與西班牙嘅拿度，瓜分最佳男女網球員獎項。講到最威水嘅大贏家，當然係NBA總冠軍達拉斯小馬，隊波攞咗最佳團隊外，總決賽MVP奴域斯基亦擸埋最佳NBA球員及最佳男運動員，真係威過威士忌！
