無綫主辦嘅《香港先生選舉》聽日舉行，最標青嘅10號李晉強一出閘就爛嘴爛臉脫腳扣分，餘下嘅奇人異士參賽者惟有出怪招突圍。
唔識沈卓盈
噚日喺官方人氣榜排包尾嘅失控小虎12號林志勇，同排尾二嘅2號許鴻達更加剝衫剝唔切，喺網上狂貼半裸照，以圖力挽狂瀾。
肥底嘅許鴻達減肥有成果現腹肌，即晒泳褲肉照，佢喺微博上載同高登女神沈卓盈嘅合照，附上留言係不知道沈卓盈是誰。想點？
至於已屆三張、任職救生員嘅林志勇有鋪狂烈剝衫癮，網上所貼嘅相九成唔着衫晒腹肌，一時喺室內對鏡自拍，一時又喺沙灘半裸玩chok樣倒豎葱，網友負評鬧佢死仔包，佢頂住條氣留言反駁：「點解話我死仔包呀！」林志勇又當街露點同外籍舞蹈師合照，可惜撰文錯字連篇，仲差過小學雞，竟然嗌人哋做「師博（傅）」、又話「應（認）識了他」咁，貽笑大方！
鬥晒攬女相
5號江俊霖喺facebook有唔少同女友一齊影嘅親密合照，嗜玩易服嘅3號黃建東亦唔執輸有攬女照，佢喺網上表示，想喺決賽必殺技環節中主唱由佢作曲編曲嘅《為你祝願》，所以佢上載YouTube嘅連結，等大家對佢嘅演出先睹為快，片中嘅佢染金毛自彈自唱，成個look似足MK陳豪，歌聲平平但慘樣無敵，佢仲強調會「把自己獨特的光芒釋放出來。」唔使釋放，單睇表面佢已經好獨特。撰文：辰秀
惡搞度+3 爆笑度+4 給力度+5