林峯嘅嫲嫲林黃達治日前逝世，享年95歲，噚日林家喺香港殯儀館設靈，並會喺今日出殯，遺體火化後骨灰會安葬喺廈門。林峯噚日下午近三點抵達靈堂打點，佢父母、堂妹林夏薇同一眾親友亦有到場，由於林家喺廈門有頭有面，所以唔少廈門政協委員送上花牌、祭帳，而Twins、容祖兒及樂易玲等都送上花牌慰問。
林峯前晚去咗《勁歌金曲》做嘉賓，噚日又去到靈堂，佢喺大約四點同林夏薇接受訪問，夏薇顯得好傷感，更雙眼通紅，林峯表示：「嫲嫲好可愛，佢年紀咁大，算平安去世，而且家佢已四代同堂。自己心情OK，喺之前佢病情反覆，今次離開有啲突然。」林峯話前兩年嘅演唱會嫲嫲都有捧場，但今年就嚟唔到，不過佢會向嫲嫲滙報。
拒談梁嘉琪緋聞
此外，近日林峯同梁嘉琪傳緋聞，有指梁嘉琪同佢抹汗，佢聽到就即刻話：「呢啲等《回到三國》播時先傳，唔好嘥。」記者取笑林峯因為嘉琪平胸唔啱佢，加上前女友潘霜霜又係暴乳一族，林峯即作狀打記者，又尷尬話唔答。