一種叫Planking，即係鋪板，又名為「仆街」嘅玩意近年風行全世界，除咗NBA球員都好熱衷之外，連足球員都玩埋一份。英超嘅曼城到美國踢季前熱身賽，點知班「打工皇帝」無聊到玩「仆街」，仲好似做show咁表演一啲高難度動作㖭。
新球季要出戰歐聯嘅曼城，就去北美踢世界足球挑戰賽積極備戰，點知班「打工皇帝」喪玩「仆街」，其中胡禮菲臘斯、米卡李察士同赫特玩得最出位，以胡禮菲臘斯最癲！「胡禮仔」玩咗幾個姿勢，其中將對腳勾住道門嘅頂部，腳踭成90度角，成個人垂直咁倒吊喺門嗰度，真係腦充血都似！而且佢仲將個身打橫掛喺車窗，而且仲係有人揸緊架車，「最高難度」非你莫屬喇！
胡禮菲臘斯嘅隊友米卡李察士就「最冇厘頭」，爬上去戰術板上面打橫趴喺度，另外仲將個頭塞入焗爐度，想點呀！赫特玩得都算正常啲，但將個身晾咗喺曼城隊徽隔籬嘅欄杆度，梗係要頒個「最hardsell大獎」畀你喇！
其實好多NBA球星都玩「仆街」嘅，其中魔術嘅懷特侯活同阿蘭拿斯就係表表者。無論喺飛機、廁所、酒店行李車、垃圾桶同公路收費站等等，都留低佢哋嘅英姿。家足球員連玩埋一份，就睇下佢哋同NBA球星邊個玩得勁啲喇！
曼城兵多騎呢
講番轉頭，曼城領隊文仙尼一向軍紀嚴明，肯定會下禁令唔畀班球員玩「仆街」，邊有領隊想喺記者會上公佈有球員因為「仆街」而受傷？另外，「壞孩子」巴洛迪利都唔執輸，日前喺洛杉磯着咗條姣婆短褲示人，條花花褲怕且連C朗都唔會着。曼城兵咁多騎呢行為，唔激死文仙尼至奇！
專家之言：「鋪板」可鍛煉肌肉
浸大體育系副教授雷雄德博士表示，Planking「鋪板」是潮流，亦是「等長收縮」的練習，近期一班足球及籃球員流行此風氣，一點也不意外，相信他們的心態都是找地方表現自己，只要「鋪」的高度確保安全，無傷大雅，亦不會有潛在危機。他更指出，Planking也有鍛煉效果，可以鍛煉腰、背、股大肌及大腿後肌，這種鍛煉稱為「等長收縮」，意思是肌肉收縮得來是像沒有郁動，但效果有限；現在流行的是伸直身體180度「鋪」在物件上，應該170度、160度、150度的角度都要「鋪」，鍛煉才叫完美。