PSVita抵港首試 體驗無重飄浮

PSVita抵港首試 體驗無重飄浮

經過美國E囗,大家對新一代PSVita應有初步了解。早兩日,呢部被譽為史上硬件最勁抽嘅手提遊戲機更殺到香港,俾各大傳媒親身試玩!當中以重力體感作賣點嘅《GravityDazy》,遊戲製作人外山圭一郎上陣示範,佢為咗克服遊戲內嘅「反地心吸力」,拎住部Vita左擰右擰,投入度爆燈!

記者:陳國輝
攝影:陳盛臣

3D空間玩無重

為求測試PSVita的硬件有幾勁,今次仲有來自《GravityDazy》嘅製作人外山圭一郎,由佢親自示範,教大家玩呢款利用咗Vita重力技術而設計嘅Game!最特別當然係飄浮於空中嗰種自由自在感,想得到呢種「技能」,其實一啲都唔難!當你獲得呢種能力之後按下R掣,女主角Kitten就立即飄浮喺畫面正中間,而最過癮嘅係,你必須將成部手提機上下左右不斷移動,轉換視點,搵出合適嘅降落位置(亦即紅圈),以繼續進行遊戲;甚至當你要同敵人戰鬥時,更可借助呢一種衝力,轉化成為飛腿攻擊,可以話一邊玩一邊幫雙手做運動。但如果喺人多擠逼嘅車廂玩,就要小心打親人!

■製作人外山圭一郎(右)親自示範及監督。

■當你將成部機反轉玩嗰陣,背景亦跟住反轉。

■當見到紅圈,再按一下R掣就會衝埋去。

■同敵人戰鬥嗰陣,你仲可利用身邊物品作攻擊。

要幫Vita掃背

大家最關心嘅,是究竟PSVita幾時才正式推出?售價又要幾錢?對於以上問題,SCE並無作確實回覆,但佢哋就講,硬件嘅開發完成度已超過70%,距離開賣時間已經不遠,有興趣嘅Fans唔該再等官方公佈喇!
講番小記第一次接觸PSVita,雖然喺網上已見過無數次,但實際拎上手,又有另一番體會。先談外觀,全黑外殼雖然有啲似PSP,但兩邊手握位好圓潤,而且拎上手的感覺比以往舒服得多;更方便嘅係,機背位置新增一塊TouchPad,你只要輕掃一下,就可做出把相片逐張揭嘅效果,感覺似幫部Vita掃背一樣,都幾搞鬼!但要留意,呢部機重量唔輕,加埋厚度達到18.6mm,無可能當手機咁袋住出街,俾女仔玩有少少難度。

■當日傳媒要分批試玩,場面幾乎逼爆。

■同場仲有《Uncharted:GoldenAbyss》及《LittleBigPlanet》試玩。

■用手指喺「背部」捽兩下,就可以睇漫畫。

Profile

中央處理器:ARMCortexA9
圖像處理器:SGX543MP4
體積:182×83.5×18.6mm
屏幕:5吋電容式OLED芒
相機:640×480像素
卡位:PlaystationVita卡插槽、記憶卡槽、SIM卡槽
推出日期、售價:待定

■角色設定好漫畫風格,據講參考自法國。