這日在會所停車場取車，見到有一家四口行近，於是唔開車住，讓佢地上車先，聽到父母子女都以英語交談，呢類情況，在香港日益普遍，晚上左丁山在所住屋苑行圈，每每聽到不少兒童以英語交談，好多中產，富裕家庭父母唯恐子女英文水皮，在屋企唔同仔女講廣東話，全部英語對白，子女讀書，自然係入私立英文學校，英基、國際學校等等。左丁山唔反對人地用英語教細路，只係好奇，想知道呢類細路究竟對中文有無興趣，中文程度如何，如果佢地以後只識英文，中文唔掂嘅話，大個之後搵工一定有困難。一位世姪女在英國讀完法律，考一間英國大律師行（香港有分公司），點知第一關就係考中文筆試，佢為之愕然。
正因為個個細路要學英文，故此英文學習書本甚為暢銷，馮強啦，褚簡寧啦，甚受歡迎。一位「古老」英文老師來自英國，佢就話英國學童嘅基本課本NewFirstAidinEnglish係最佳課本，香港學童應該必讀必學。有出版界朋友話，彭定康會喺十月底來香港，為小朋友講故事，左丁山聽咗，即刻問：「肥彭喎，點解特登嚟香港為小朋友講故事？」
再聽多啲，肥彭係牛津大學校監，而牛津出版社（OUP）今年會推出一套巨型幼兒英語學材「OxfordPath牛津幼兒英語」，對象係零到六歲嘅幼童，以最新嘅neuroscience與「第二語言學習」嘅學術研究為基礎，經多年研究先至成書。小朋友跟住整套書學習嘅話，六歲就可以認識「牛津基本字典」內嘅二千個英文字，學懂初階英語拼音。肥彭好鍾意香港，OUP請佢老人家出山來港，一為神功，二為弟子，梗係制啦，到時記者最緊要問佢點樣教細路學英語，唔好問佢甚麼替補遞補機制，否則佢連蛋撻都食唔落。
教學生英語，各師各法，有新課本新課程新科技固然好，但萬變不離其宗，最重要還是個人意志力。莊偉茵小學時英語水皮要留級，睇吓佢，今天是國泰航空之最高級女僱員，事在人為吖嘛。