早幾日的紅旗風暴，不用筆者多說，不少行家已指出依穆迪的標準，即使老外企業亦唔見得管理超卓，針對中資企業看來另有用意，陰謀論看，背後似有大鱷搵穆迪出手，令自己的沽空算盤可以打得響。香港股市向下炒的情況卻越來越多，這種情況對以揸股為主的一般投資者尤其不利。
港股久被諷為大戶提款機，以大前日為例，雖然外圍股市普遍走弱，但港股竟成為全球跌得最傷的股市，實在令股民難受，也揭示了本港股市存在深度不足的問題，監管機構連在投資者的保障上也做得未夠好，實在無必要倉卒推行改革，否則隨時出現開市時間長，產品種類多，卻偏偏無人敢碰的局面，玩死金融業與玩死香港無分別。
伯南克暗示可能會推QE3，而歐豬方面似乎各方都意識到問題再拖，後果可以非常嚴重，因而亦見各國及歐央行加緊步伐，希望可以將問題安定下來。
雖然穆迪宣佈檢討美國信貸評級，並可能下調，不過，標普之前亦曾說或調低美債評級，因此並不算甚麼新鮮事，美債始終牽涉太多東西，筆者相信美國最終都會在死線前通過提高發債上限。
好倉部份先套利
正路看消息面應有所好轉，但這兩年的教訓是凡事不可太正面，伯老的說話可以被解讀為唔衰就唔會有QE3，就唔會有平錢，因此難保期指唔會穿之前21500點的底部，故要有兩手準備。
士佳在恐慌日加注的好倉會吼22100點部份套利，先封蝕本門，其餘的則會博見底咁做，望大賺特賺。相反，如果要逼出QE3，一定要製造恐慌，所以估計穿底後仍有1000點跌，做法是一跌穿便吼反彈做淡倉，以賺1000點為目標。
張士佳
寶來證券（香港）資產管理部董事
本欄逢周一、三、五刊出