高登紅人劉子千（劉家昌個仔）最近推出新碟《感動》，宣傳鋪天蓋地，佢首俾人質疑由父親代唱嘅四洲廣告歌「腫果蝸跌挨而牙~（中國我的愛）」蠶食廣告時段無限loop，已令人「震憤」，點知千千轉個頭又有給力新作，推出冧女情歌《唸你》，仲請埋寶島索女鬼鬼拍MV。不過首歌俾網民笑為「生化武器」，睇埋MV仲以為坐時光機返咗70年代！
遭劉家昌教訓
呢首so-called全球矚目嘅《唸你》MV，花咗劉家昌成個月去策劃同拍攝，仲借埋私伙大廳出嚟拍，認真唔話得。先講畫面，MV拍到好似家庭電影咁，又採用泥黃色營造古代氣氛，奇在主角千千同鬼鬼嘅裝束鬼咁摩登，九唔搭八之餘，最慘係娘爆。千千儼如過度活躍症咁對住鬼鬼唱：「我的字典沒有（高八度）放棄！因為已鎖定你」一聽已經好難唔笑，難為鬼鬼仲要扮情深望住佢，唔笑已經交足戲。
不過，鬼鬼之後同傳媒爆料，話劉家昌當眾教訓個仔，鬧佢同靚女唱情歌都要NG，問佢係咪男人嚟喎！