繼薛凱琪嘅「裸獅」唱片封面想喺港鐵落廣告，被人以太性感為由拒絕，DJ森美嘅新書都遭逢此厄運。
森美將喺書展期間推出新書《來！戀愛大作戰！》，以心理學角度講男女交往嘅拍拖大法，於是諗咗用歐洲一個愛神丘比特石像嘅身，key上森美個頭嚟做封面相，點知港鐵方面以太少布為由拒絕佢哋落廣告。
「纖體廣告仲少布」
森美噚日接受訪問講起都氣憤，佢話：「又冇show重要部位，連性感都講唔上。」佢話自己冇咁fit，所以用石像，仲話：「如果我咁fit就學o靚模出寫真啦，好奇怪o靚模仲可以喎，港鐵有好多纖體廣告仲少布啦，係咪歧視男人？」
卒之出版社要加黃條遮住石像下半身先可以過關，森美話：「其實好冇必要，石像係藝術品，同色情無關，我本係文字書，冇理由色情，唔係裸露身體就叫色情，唔通冲凉係鹹濕事咩？咁係好差嘅教育，色情同情色嘅分別佢哋識唔識？」
森美話：「我打算喺節目開放畀大家討論，究竟我個封面係咪淫穢，我都想知究竟係有人過份道德退後，定係我過份前衞，究竟香港社會嘅道德同藝術標準喺邊？」森美話希望賣書時唔使包黃條，但出版社決定咗包埋。
