上季失落聯賽冠軍嘅南華，昨日喺新帥高世安（JanKocian）同足主羅傑承監督下喺小西灣開操，JK喺驟雨過後的烈日下帶操足足兩粒鐘，成班球員都身水身汗，濕過跌完落水。為咩咁搏，咪因為JK同南華都要翻身囉。
前日先到香港嘅JK，睇落精神奕奕，操練時一絲不苟；事關JK之前喺中超教江蘇舜天，教咗5場就離隊，今次得羅生天價羅致，仲大讚佢喺香港足壇有史以來銜頭最勁嘅教練，梗要交足功課，幫南華同佢自己打翻身戰啦。JK話今次起碼球員會聽得明佢講咩：「我同江蘇舜天球員同教練團都有溝通問題，喺中國用英文溝通始終有啲難，希望嚟到香港會好啲。」高世安早兩個月同江蘇隊提早解約，成為首位走頭的中超教練。
JK知道南華想重返第1，而佢就用行動表明，勤操係最好嘅方法。第一次見球員，JK就要佢哋跑足兩粒鐘，計埋飲水最多唞得10分鐘，就連有傷在身嘅陳偉豪都唔敢偷懶。JK之後講到明「紀律第一，技術第二。」咁邊個敢唔跑先？
3個外援今周內決定
講到明今季要贏晒4大錦標嘅羅生，對呢個注重體能、有啲金判坤影子嘅新帥，當然有讚無彈：「我對JK絕對有信心，佢有咁多年踢國家隊（捷克）同教波嘅經驗（包括德甲科隆同法蘭克福助教），絕對喺香港球壇歷來資歷最好嘅教練；我同佢有共識，第一要加強球員體能，第二要踢得快上快落，佢夠晒資格教南華。」
羅神仲話簽咗一年約，唔擔心JK中途劈炮。之後就話傾緊嘅3個外援，有巴西、澳洲、南韓等人選，今個星期內會決定，最緊要跟到快上快落嘅節奏。
海強：一步一步咁進步
休季期間俾多隊斟介、最後因為同南華感情深厚而留低嘅李海強，收操後第一時間搵冰敷腳。佢話始終係第一課，期望新教練帶來新方向同進步空間，「唔好講要捧幾多隻盃，一步一步咁進步，大家唔好畀太大壓力！」至於陳肇麒就好風騷咁話今課操得OK，全靠之前同香港隊集訓咗兩個禮拜，不過新教練上任，成隊都要適應吓，家最緊要做好本份。