喺電視劇《金枝慾孽》入面，陳豪飾演嘅孔武出蠱惑而令自己飛黃騰達，不過，由巴甲富明尼斯轉投中超富豪球會廣州恒大嘅阿根廷中場孔卡（達里奧干卡），就全憑真材實料，以年薪5,500萬港元做咗中超甚至相信係東亞最高人工嘅球員，但就唔係傳聞所講，人工唔係僅次於美斯同埋C朗而成為全球第3高囉！
有中超曼城之稱嘅恒大為咗挑戰國內外嘅錦標，從來唔吝嗇金錢，之前就用3,500萬港元，從柏迪遜引入打過歐聯嘅巴西前鋒施奧（國內叫克萊奧），結果呢位每年1,120萬港元嘅射手亦不負所託，帶領球隊喺頭半季聯賽攞到11勝4和，兼且高踞榜首。
至於新加盟恒大嘅達里奧干卡，來頭仲勁，事關佢喺上季巴甲嘅MVP，所以恒大使咗7,800萬港元至買到佢。
喺國內叫孔卡嘅達里奧干卡喺周三嘅記者會上話：「我知道中國足球同南美足球好唔同，我會喺進攻方面花多點心思，為球隊帶嚟一啲不一樣嘅東西，為中國足球帶來一啲改變。如果問我喺踢法上似馬勒當拿定美斯，我會覺得自己更加似美斯。」
日聯最貴鬥莉王冇得揮
恒大董事長劉永灼話：「達里奧干卡係中超的美斯，美斯就係西甲嘅達里奧干卡。恒大簽外援，就係為咗提升整支球隊嘅戰鬥力，孔卡只係我們圓夢嘅起點，我哋要喺5年之內捧亞冠盃，然後仲要衝擊世冠盃嘅冠軍寶座。如果攞不到亞冠盃冠軍，我哋將會簽入更高級數嘅外援。」
達里奧干卡能唔能夠好似美斯咁，幫自己隊波贏盡錦標，仲有待證明，但佢幾可肯定係東亞球壇嘅打工皇帝，年薪有成5,500萬港元咁高，比起日聯最高人工嘅田中鬥莉王（1,470萬港元），多成4,000萬港元有多，唔怪得喺日聯打得好嘅土炮同外援，都一個個走晒去中東同歐洲！
雖則達里奧干卡嘅人工冠絕東亞，但就係唔傳聞所講咁高，同巴塞隆拿嘅美斯（年薪9,100萬港元）同皇馬嘅C朗（年薪1.13億港元）比，仲有好大距離；而即將俾曼城放棄嘅後衞布歷治，人工（年薪5,800萬港元）亦高過達里奧干卡。