亞視於七月六日下午六時三十五分左右，爆出搶錯獨家「死錯人」之新聞，全港先轟動，後恥笑，亞視新聞部行家無法子唔面紅耳熱。七月七日早上，左丁山對一位亞視行家講：「榮少乜咁大膽呀，未經證實噃！」行家話：「榮總邊度會咁o架，仲有Tammy把關呢！佢哋一定係收到上頭電話先至會批准新聞出街嘅！」邊個係上頭？王征是也，當時嘅傳聞係王征，是江澤民之堂姨甥，從家族聽到消息。
唉吔，點知係流料，新華社否認，中聯辦憤慨，梁家榮與譚衞兒要去中聯辦不知是解畫還是負荊請罪。七月八日左丁山在飯局碰到一位亞視前新聞部資深人士，問佢：「點睇呀？榮總話佢個人負責晒噃！」呢位人士冷笑一聲：「打句問句我都唔相信係梁先生落命令出呢條新聞，根本完全唔係佢嘅作風！」
人哋都孭晒上身咯，其他人就一於唔信，冇法子啦。想話搶先一步發放獨家新聞，特別係關於中國極重要人物嘅死訊，係好高難度動作，偶一不慎，就會撻直，正是搶得到，未必好。梅鐸新聞集團之「世界新聞報」夠時時搶到獨家消息、名人醜聞啦，咪又千年道行一朝喪，遇上滑鐵盧，竟要關門大吉！有一百六十八年歷史嘅報紙就此收檔，二百幾人冇工做，皆因搶新聞過份得滯啫。
其實今日twitter、微博當道，快人一分鐘嘅突發大新聞出街後，半小時內就會傳遍全球，好多人根本唔知道，唔理會邊一個機構/單位係第一個報導嘅，反而一啲深入調查式新聞報導，如果係報刊獨家刊出，對公眾立即產生衝擊/影響嘅話，先至係有意思嘅獨家新聞，例如「水門事件」。江澤民死訊之類嘅新聞，重要嘅不是最先獨家，最怕係「獨無」先至羞家啫。
梁家榮與譚衞兒都係好有經驗嘅新聞專業人才，不知何故，會在江澤民死訊呢件事出錯，十分可惜，譚衞兒尤其是中國新聞專家，當年採訪中國大事，看TVB有陳慧兒，ATV有譚衞兒，競爭得非常精采，而今陳慧兒已退休，衞兒要撐住啊！