記者日前表明身份找村霸家族欲了解村民間的紛爭，甫走近他們的鐵皮屋已險被惡狗咬到，其間多頭惡狗一直狂吠不休。擾攘一會，由許家二女上陣，甫見面態度已不甚友善：「首先我想問返你點解無端端出現？」然後不滿記者拍攝立即報警。
對於有村民指被狗吠聲滋擾，許直言：「見到陌生人唔吠，養狗嚟做乜？」客貨車長期擋路問題，她強硬說：「你唔好亂咁聽人哋講埋啲咁無稽嘅嘢！」反指早前一輛汽車停在她門前才是阻路，更指示記者向後排村民了解事件真相，不要聽住在前排十多戶「搞事村民」的投訴。
斥蠱惑仔入村搞事
「呢啲人（搞事村民）嚟咗幾耐啫？2007年7月至嚟嘅，2008年開始搞事，呢啲嘢根本個個知，邊個帶啲政治入嚟呀？一班活躍分子喺呢條村搞事，不斷喺度搞事，搞到掟汽油彈！」
她又指：「佢哋1月10日開始有班蠱惑仔進駐呢條村，直情係黑社會紋晒身嘅，就係呢班人夾錢請入嚟呢度搞事嘅。」她又指該班蠱惑仔「一上嚟就攞燒烤爐砸我！我根本都唔知佢哋係邊個，第二就係周圍去攞啲棍扑啲狗，係見狗就打。」記者問她事前有否跟村民衝突，她說：「我哋一向低調，無理呢班咁嘅人，佢哋住響嗰度，我就住響呢邊！」《蘋果》記者