醫學會早前進行業內調查，八成醫生反對替補機制。吳錦祥是其中一名反對者，7.1前夕，他罕有地站出來，與其他專業界別攜手開記者會，反對替補惡法。「呢個係好荒謬嘅制度。」身為醫學界選民的吳錦祥希望，立法會內業界代表梁家騮（圖）可以作出明智的決定，「唔可以支持一個咁侮辱人智慧嘅建議」。
吳錦祥直指，政府聲稱要以替補機制堵塞所謂漏洞「多此一舉」，「上次個補選，係有人參加o架嘛，唔可以話係漏洞、話嘥錢o架喎，搞民主係要花啲錢o架啦，根本就無嘢要堵塞。」
政府堅持變相公投下的補選投票率偏低，公帑被白白浪費，吳錦祥對此最覺「硬耳」，「50萬嘅投票率都叫低咩？如果唔係阿爺吹雞，建制派都會派人參選o架啦，即係仲有三、四十萬選民未投票啦。」他強調建制派自動棄權在先，「佢哋自己唔派人去參選，與人無尤，點解話有個漏洞呢？根本係政府喺度混淆視聽。」
敗者翻生好荒謬
被政府「監生」剝奪原有投票權，任誰也「好火滾」，吳錦祥直指，「呢個咁嘅替補機制，全世界都無，點解香港會有啲咁荒謬嘅嘢？」他所指的「荒謬」，是替補機制造就「敗者復活」，「輸咗嘅人可以翻生當選？真係好荒謬，好難接受。」
身為醫生的吳錦祥指，接觸過的同業普遍認定「冇乜可能要對呢個替補機制收貨」，認為立法會醫學界代表梁家騮應堅定向政府說「不」，「我唔理佢（政治立場）左、中、右都好，除非佢要盲從政府，否則冇理由去支持一個咁侮辱市民智慧嘅建議。」