港股噚日升超過300點？？？華華都係睇亞視新聞至知！！！
繼上個禮拜「率先獨家」報道前國家主席江澤民「病逝」之後，香港良心亞洲電視噚日再下一城整多單獨家新聞，噚日亞視12點半新聞，畫面底下嘅滾動新聞消息，竟然係「港股早段顯著造好，最多升逾300點」！當堂令食緊晏嘅華華打個突！
恒指全日冇升過
莫講話升300點咁好景，噚日個市低開後，全日丁點冇升過，咁唔通係手民之誤，本來係「跌」逾300點，唔覺意寫咗「升」？似乎又唔係噃，港股半日最多只係跌266點之嘛！又難道係，亞視今次又收到獨家猛料，呢條題，其實係寫緊今日、後日又甚至乎係下個星期嘅大市？
Anyway，如果班行家又去大埔追訪A記大股東王征先生嘅話，唔知佢仲夠唔夠膽大聲話「在香港這樣的地方發生這樣的事，也是很難避免的」，又或者「你們看亞視的新聞吧，我也是看新聞才知這個消息」？
一句講晒，港股獨家喪升再加江老到家都仲未乘鶴西去，一而再嘅「猛料」，亞視新聞，豈止快人一步，分分鐘走快行家一年喇!
李華華
mailto:[email protected]
