愛情事業兩得意的鄭秀文（Sammi）前晚在澳門開騷，獻唱冧歌《唯獨你是不可取替》時全程表現得甜蜜滿瀉，盛傳年底結婚的她更戴上十多両重的龍鳳鈪，不過Sammi就重申不會為愛情而放棄事業，更揚言冧爆「god」多過男友。
一連兩場的鄭秀文澳門演唱會前晚在金光綜藝館揭幕，Sammi先後換上多套歌衫，當中有9成都是新歌衫，打頭陣以全身黑色戴帽鐵甲look示人，但原來另有乾坤，中間是超deepV兼大露背，但Sammi就用黑色呔遮掩骨胸，SM味甚濃。
讚龍鳳鈪夠潮
自從Sammi與許志安翻撻後，每次提起男友她都有問必答，盛傳兩人將於年底結婚，早前兩人更被指到日本預支蜜月，雖然婚期未證實，但Sammi日前就漏口風表示希望電影延遲讓她可以好好享受拍拖。前晚Sammi在台上也全程春風滿面，當獻唱冧歌《唯獨你是不可取替》時更甜到漏，她笑說：「每次演唱會都要唱呢隻歌，今次亦唔例外。」現場粉絲群起大呼安仔名字，Sammi顯得十分受落。
前晚個唱Sammi得景福珠寶贊助，原本準備了五對逾17両重的龍鳳鈪給Sammi襯旗袍，但她因趕時間出場而沒有戴足五對，她在台上說：「原來龍鳳鈪咁潮，唔一定襯裙褂。」前晚Sammi的家人也有來捧場，其姐夫在台下被Sammi見到打呵欠，她抵死說：「做乜打喊路，好悶呀？睇咗咁多次。」
事後Sammi接受訪問時表示行動不便的父親也來捧場，令她開心不已，問到為何不邀請安仔時，她說：「唔使，做嘢嘛，佢太知我個人，我上次係講笑，自己唔會為愛情放棄事業，仲想杜sir部戲快啲開，我心情ready好。」自言首次戴龍鳳鈪的Sammi被追問婚期時，她就坦言未想過結婚，還說：「我有排都唔結婚，阿爸阿媽可以慳番。」
講神唔講愛人
記者取笑她有拖拍所以在台上冧爆，Sammi撒嬌說：「哎吔，首先乜嘢笑都係話嗰樣嘢，係我信仰呀，我諗起god，冇理由畀咁大credit佢（指安仔），唔好乜都關事。」
採訪：胡比
攝影：仇志德