《世界新聞報》關門大吉，最後一日拜拜前嘅重點體育新聞係講一個新開始，細緻披露車路士新任領隊波亞斯訂下「十誡」，擺明係要破舊立新，樹立個人威信，但睇完啲規條，實在擔心會弄巧反拙，搞到兵變就弊傢伙。
隊友共食就會一條心？
呢個所謂嘅「十誡」，第1條係要朝早9點準時操波，理你天王老子，一遲到就要罰錢。其他規條看官可以細意咀嚼，好似操練同操練之間要留喺酒店休息、仲有避免呢支聯合國兵團雞同鴨講，個個都要講英文。如果你認為上述呢幾條規矩正路，咁以下幾條應該幾騎呢。
其中一條係要同隊友共食，以前約定俗成嘅習慣係班球員操完波後各行各路，食完至返歸再一齊練波，家陣唔畀球員外出。講真，中學生都可以離開學校食飯啦，一定要一齊食，唔通咁就會一條心？其他屬於笑料嘅係唔該喺訓練場外剪頭髮。
掛住昔日光輝針對老鬼
至於最刺激到球員神經嘅，擺明係家人探訪免問，呢一招驟眼睇好合理，不過車仔咁多住家男、準住家男，或者假住家男，好似泰利、林柏特最鍾意做騷咁晒恩愛、晒親情，你話操波前後唔畀佢哋同家人見面，邊有新聞做？
剩低幾條都係屬於口號式，好似唔好掛住昔日光輝、咪使旨意諗住不勞而獲、如果一心靠名氣食老本聽揸兜，似乎係刻意針對陣中好幾位高薪嘅老波骨喎。
過去都好多足球領隊訂下「十誡」，例如卡比路、摩連奴，而好似波亞斯咁多新元素更加係聞所未聞。再講，卡比路、軒迪克呢啲名帥咁有江湖地位，又邊係只有33歲、未贏過歐聯嘅波亞斯可比？小朋友，你有你訂「十誡」，班老鬼肯唔肯聽就另一回事囉！