上周五魏力推介中國地板（2083），一早起身睇其他報紙，發現好多股評人同專欄作者都一齊唱好，威力非同小可，開市即時搶高5%，之後逐步整固。
每日有幾多個專欄推介同一隻股票，實在無法預測，魏力的經驗是除非有特別消息，否則若高開5%或以上，不妨等股價從「燦爛歸於平淡」先出手，或者掛低10格8格買，多數都可以執平貨。
平日少睇工業股，但精電（710）呢隻業績翻身股不容錯過。集團本來做手機顯示屏，但業績麻麻，金融海嘯後，舵手蔡東豪決定轉搞競爭較小的汽車顯示屏業務，結果一鋪翻身，業績由09年的「滿江紅」變為勁賺2.1億銀，股價由去年初2元水平，飆升至今年4月5.78元，升近2倍！
精電現時在全球汽車顯示屏市佔率高達25%，歐洲市佔率更達一半，去年又獲日本豐田定單，攻入日本市場，未來市佔率有望再升。走勢方面，精電上周五大成交抽升3.5%，收5.40元，MACD牛差距擴闊，高盛、巴克萊等大行買盤積極掃貨，建議5.40元左右買，短線睇6元，失守5.20元止蝕。
魏力