唔好睇小一籠小籠包，整得好味，唔單止門庭若市，仲可以發大嚟搞兼上市！好似過江龍「金牌小龍」就係一個好例子。
光大早排曾經斟合作
華華八到，中國光大嗰邊覺得「金牌小龍」做得好掂，對佢哋好有興趣，先排已經搵佢哋老闆傾偈，睇吓有無得合作。光大斷估唔會識整小籠包，所以傾合作，大概係喺金融市場運作嘅範籌。
咁傾到咩進度呢？仲未傾成！探子老友同華華講，「金牌小龍」個台灣老闆金竪嘅算盤係，想呢兩年內開夠30間分店，之後就做加盟店，跟住先搞上市。不過，係自己搞冇預外人，唔稀罕人哋幫手，皆因金老闆覺得自己好掂。
至於「金牌小龍」嘅小籠包到底有幾堅？華華食過幾次，但唔係食家無謂多作評論。查實「金牌小龍」前身係「鼎泰豐」喺深圳嘅加盟店，後來「鼎泰豐」話唔like佢哋賣刨冰同滷肉飯等台式小吃，於是續約嗰陣加以留難，包括喪加權利金，卒之搞到金竪忍無可忍另起爐灶。
一場小籠包PK賽就係咁正式展開，喺香港，「金牌小龍」除咗皇室堡同埋TheOne，據聞第3間分店將會落戶新地（016）新蒲崗嘅新場Mikiki。
李華華
mailto:[email protected]