銘源醫療（233）由上年11月高位1.40元，到家陣累跌六成，有得諗吓。銘源主打祖國腫瘤檢測蛋白晶片產銷供應，及醫療保健業務。今年年頭，銘源同「上海醫藥分銷」簽咗3年分銷協議，將集團產品進一步打入新醫院及藥店。後邊嘅上藥分銷，係全國醫藥分銷龍頭，加埋家陣祖國富起來嘅同胞多咗，而祖國亦都面對人口老化問題，對體檢需求亦自然多咗，銘源有呢啲優勢，繼續長賺長有。係咁意計數，銘源2011年及2012年度（12月底止）純利增長20%到1.47億銀及1.76億銀，預期PE15倍及13倍。呢轉銘源見調整近橫行底0.50元，小注博2012年度PE上返往績16.4倍水位，Chinaplay唔係貴，而銘源價見0.71元，潛在回報率都講緊40%。
泛海折讓大炒落後
泛海集團（129）系中，呢轉由泛海酒店（292）跑出，股價創1年新高。炒落後，買泛海集團。又泛海未計酒店重秤，最新NAV5.8元，現價1.92元，折讓高達67%，折讓又係大到流口水，炒泛海NAV折讓亦得。博泛海追返泛店半年近30%升幅，泛海要見2.50元，目標價NAV折讓都仲有56%，實情仲有大把向上收窄空間。
錢雋