錢國偉在無綫工作超過20年，最為人津津樂道的是圍在他身邊的美少女，離開娘家執導的首部電影《戀夏．戀夏．戀戀下》自然要賣大包找來大批美女助陣。滿以為他跟女孩子拍照會手到拿來，誰知他比穿三點式的女孩還忸怩，就算幫他找來大號波褲，他也堅拒下水。事後解釋是不想再被人誤會跟女演員有任何瓜葛，雖然食得鹹魚抵得渴，但最想還是找個圈外女友正經人家。撰文：何永寧
真人真事發生在本公司影樓，在交接場地期間，電影《戀夏．戀夏．戀戀下》導演錢國偉（Wilson）跟上一手拍照的o靚模Phoebe碰面，她見到Wilson恍如螞蟻見蜜糖貼身打了個招呼，臨走時依依不捨說「Call我噃」，只差現場人多沒來個goodbyekiss，難怪Wilson笑言知道「好多男人想打我」，理由是不忿經常有不同女性在他身邊氹氹轉。
直認有女生親近
偏偏又有很多男士喜歡跟Wilson做朋友，他笑說：「佢哋跟住我無非為咗我身邊啲靚女。」他自言有點女人緣，但就誓神劈願從沒利用工作關係親近異性，他認真說：「係有好多女仔以為黐住我就可以入行，記憶中有，但一定唔多，反而我見到合適嘅女仔，主動要佢哋幫手仲多，係女仔幫到我唔係我幫班女。」
在無綫年代，Wilson監製的節目每每都需要大量新面孔，這些機會自然成為一班發明星夢少女的踏腳石，他說：「《美女廚房》同每年拍嘅《四葉草》確實要搵好多女仔出鏡，我承認係可以用呢個身份去識女仔，但真係冇。可能傳媒影親我，身邊都有好多女仔囉，反而我造就咗李思捷同春卷、側田同香蕉，自己冇份。」
出事時嘗盡冷暖
誤會Wilson的又豈止圈外人，今趟他初次執導電影《戀夏》為例，監製黃柏高（Paco）覺得他很合適拍這套片，Wilson說：「Paco打電話嚟話有部戲講夏日、陽光、美女同比堅尼好啱你拍，之後冇幾耐又有另一位監製打嚟話『喂Wilson，有部戲講蘭桂坊、夜蒲，好多女仔，好啱你』，我心諗『吓，日夜都關我事，唔係呀』，不過有工作當然接啦。」
目前Wilson仍是孤家寡人，希望將來找圈外人做女友，自然不想跟太多女孩子連在一起，見報更是可免則免，他無奈說：「第時同個女仔拍拖，人哋父母話『阿女呢個肥仔好花心好多女仔』，咁仲使識女仔拍拖嘅？」雖然女人緣十足，但最交心朋友依然是男士，更是患難見真情，他說：「之前出事時喺街見到有啲朋友，佢哋真係當睇你唔到，招呼都唔打，係鄭伊健、BIG4同曾志偉一班人不離不棄，我覺得個天對我真係唔錯，鄭伊健更加冇得講，大家一齊喺《430穿梭機》捱出嚟，微博啲人直情話我係佢女朋友。」
在無綫時大樹好遮蔭出糧準時，出外闖的世界海闊天空但要自負盈虧，沒有戚戚然只能信命，Wilson說：「當個天要你轉彎時你咪轉囉，出嚟拍電影真係發覺乜都要靠自己。以前無綫份工淨係做好自己就得，出嚟拍戲做導演成組人睇你頭，道具同戲服所有都係你要決定，係好權威但好大壓力。第一日開工前一晚都驚到瞓唔好，開完第一日都係要打去搵志偉求救。」
「返娘家感覺良好」
Wilson暫時完成兩部電影，成績仍是未知之數，但工作就一直排到明年2月，近日他回巢以合約形式替無綫監製綜藝節目《變身男女ChokChokChok》，重回娘家感覺沒有特別，唯一不同是用臨時員工證，他說：「證件係印住『臨時』，都冇乜唔同，返娘家感覺良好，或者第時變番『正式』，總之都係睇天決定。」
攝影：葉君海
化妝：German、Roberta、Carol、ChristineofFeelSoCool
泳衣：BodiBra
六o靚模有讚冇彈
錢國偉的朋友都覺得他的電影怎能夠沒有大量美少女，頭炮執導電影《戀夏》當然不能失威，不但人才濟濟，更雲集不同國籍美女秉承錢國偉在電視台時的傳統，合作的女演員對他的評價似乎不錯，難怪他自言女人緣不俗。
Hazel：佢個人好nice，但鍾意搞爛gag，脾氣好好一啲都唔嚴肅，仲貪玩過我哋班女仔，拍佢好開心。
Emily：我本身喺上海生活，之前唔係好認識導演，佢好照顧演員，好gentleman、好有風度。
Hailey：導演好識搞氣氛，成組人冇人驚佢，但知佢拍得好辛苦，有時食食吓飯唔見佢，就知佢喺一二邊瞓覺休息。
Betrys：佢之前畀我印象係成日俾女仔圍住，但拍落發覺佢唔係好鍾意埋女仔堆，拍戲時又好多橋。
Cindy：我係台灣人，第一眼見到佢好似一隻熊bearbear，但做起事嚟好認真好似超人。
劉羽琦：這是我第二部電影，之前拍過徐克的《女人不壞》，他們是兩種不同導演，Wilson你不會怕他。起先以為他會特別對我好，後來才發覺他對每一個女生都這麼照顧，拍他的戲沒甚麼壓力很好玩。
故事簡介：千方百計追女神
小方（方力申飾）、阿犬（敖犬飾）和小肥（小肥飾）在一個講座上結識，彼此一見如故。小方日間在手機店工作，晚上做保安，夢想是進修攝影，他迷戀o靚模女神小予（張馨予飾），連選女友都要以她的外形挑選。
接受女神缺點
生長在全男班家庭的阿犬是全職宅男，經常化名在網上論壇發言，幫人解答愛情疑難，卻能醫不自醫。有一趟三人到海南島尋夢，跟各自的女神小予、Carol（楊梓瑤飾）和琦琦（劉羽琦飾）邂逅，卻發現現實是殘酷的，各女神原來都有缺點，但憑藉少男無限青春和戰意，無懼困難，在炎熱夏天中展開愛情大戰。
