林燕妮月前被本報發現入住瑪麗醫院，其後證實患上肺炎。她昨日在中環出席新書簽名會籌款，自爆除了肺炎，更患上傷寒，發冷抽筋，痛不欲生，但她強調自己無患腫瘤病，對生命樂觀，更自幽一默，笑指已買危疾保險，患癌都有錢用。
林燕妮昨日在中環的新書簽名會，主要為港大微生物研究中心籌款，好友如莫文蔚爸爸煲靚湯招呼來賓，捧場的馬浚偉率先捐了1萬、陳家瑛則捐了6萬，還有大批好友如葉雅媛、鄭明明等捧場。
唔夠氣兼狂抽筋
林燕妮低胸上陣，化上淡妝，面容看來很精神，但說話時有點不夠氣的情況。她說：「之前入咗醫院，冇報道講得咁嚴重，啲人話我生cancer，生cancer會瘦，我肥咗成10磅，我冇事。」她指自己肺炎入院，肺炎每10年就復發一次，今次更染上傷寒，特別辛苦：「講嘢都唔夠氣，發冷，由身體入面發出嚟，抽筋抽到連㩒鐘叫護士都唔得，痛不欲生！」
驗晒心肝脾肺腎
林燕妮指自己住院兩星期，主診醫生為她驗身，證實她冇腫瘤，她說：「醫生幫我心肝脾肺腎，反轉晒嚟驗都冇事，並冇大家想像中嘅腫瘤，大吉利是。」林燕妮更笑說：「我買咗危疾保，我都恨有（cancer），如果有，可以賠錢，咁我可以拎嚟使住先。總之，我對生命很樂觀！」她在瑪麗住院期間，一如普通香港市民，只需付100元一天的住院費，益發令她感到香港醫療對市民好，她說：「所以我要捐錢，等啲醫生研究啲病菌、病毒，唔想見到啲幾歲小朋友因病死咗，父母傷心。」
採訪：顏英儀 攝影：黃文偉
