曼聯前日公佈21位美國之旅出賽名單,講到出嘅,包括新聞男傑斯、傳會走嘅貝碧托夫都有份,問題係部份參加國際賽嘅球員會遲少少歸隊啫。會方順便公佈啲新兵嘅球衣號碼,迪基亞繼承雲達沙嘅門神1號、艾舒利楊格着18號,即係退役名將史高斯嘅冧巴;至於菲爾鍾斯(圖)幾多號?4號是也!呢個冧巴喺曼聯近代史可以話相當不祥,加盟後幾乎廢晒武功嘅華朗着過、玻璃腳夏格維斯着過,球圈人士不嬲都迷信,菲爾鍾斯真係要好自為之囉。