特區政府新猷──iBond今日開始接受認購申請，一萬銀入場，以家嘅通脹水平計，年息率大概有5厘，好過唔少大藍籌，相信會掀起認購潮。不過，計唐牛話，如果大家要抗通脹，買領匯（823）就更實際。
唐牛每日返工都要經過領匯旗下嘅商場，嗰度人流非常旺，裏面嘅舖頭好似大家樂（341）同麥當勞咁，更經常大排長龍。
作為全港最大嘅屋邨商場包租公，領匯舊年可分派總額有成24億銀，現價計息率有3.9厘；而喺05年上市到家，除咗08年因為金融海嘯大跌之外，領匯每年股價都升得唔錯，舊年全年就升咗22%，今年累積都有17%進賬。
領匯上個月仲向私人企業埋手，買咗個喺將軍澳嘅商場，唐牛相信收購會接二連三㖭。領匯上星期五升咗3%，再創上市新高，未有貨嘅戰友，不妨喺10日線27蚊左右上車，今年大有機會見30蚊！
唐牛