瘦身早已不是女人專利，眼見不少車廠都為旗下產品減磅而努力就可想而知，雖然毋須捱餓，不過總要下多少工夫。最新瘦身成功例子就係保時捷的CaymanR，雖然單睇數字，足足比CaymanS輕咗55kg，減磅固然有血有汗，不過換番嚟嘅滿足感，只有置身其中最清楚。
記者：趙慧敏
攝影：楊錦文
R字頭非凡之輩
與高性能的CaymanR絕非首次相遇，早於年初在西班牙試車活動上，早有一日之緣，今次在香港重遇，CaymanR再不是跑山高手，換成金鐘太古廣場揭幕展的主角，以一身青綠色ThemeColour示人，狂野味雖然收斂了，但換來貴氣逼人，依然矚目！不過貨源有限，一眾香港傳媒暫時只得睇無得試，惟有趁機將它的內內外外看過透徹。
喺保時捷車系中掛得個R字頭，當然代表屬高性能一員，相比起同門師弟CaymanS重量減輕55kg，並且由保時捷重新打造的全新3.4公升6缸水平對向中置引擎，最大馬力輸出330匹，較CaymanS高出10匹，配上SportChrono組作及七前速雙離合器（PDK）波箱，可於4.7秒造出0-100km/h的表現，較CaymanS快了0.2秒，最高時速就被鎖定為280km/h。
瘦身工程減得就減
CaymanR在輕身過程中亦下了不少工夫，車身空載重量只是1,295kg，這全是種種瘦身工程下的成果，當中包括將車門鑲板改為鋁合金製造、座椅是超薄的碳纖座椅、中控台的佈局極為簡約，甚至乎車門手挽亦欠奉，換來的是一條紅色布帶作關門之用，甚至油缸容量亦由64公升減至52公升，真正係減得就減。
車身更矮攻彎敏銳
如果以為CaymanR會擁有完全不同的外形？可能有些失望，不過絕對保持保時捷一貫的跑格，兩邊裙腳均有黑銀的Porsche字樣，今次CaymanR較CaymanS降低了20mm，令車形更低矮之餘，高速攻彎時，反應亦更加凌厲敏銳。至於最搶眼的尾擾流，就採用固定式設計，頭燈亦作熏黑處理。內櫳方面，由安全帶到整體佈局，都充滿賽車化意念，絕對滿足一批享受落場感覺的車主。同時，車廠亦沒有忽略視覺享受，車廂的TwoTone顏色與車身襯到絕，更印證保時捷玩色確有一手。
PorscheCaymanR
引擎：3,436cc6缸水平對向
馬力：330hp/7,400rpm
扭力：370Nm/4,750rpm
傳動：7速PDK自動波箱後驅
售價：$1,111,000起
查詢29262911（PorscheCentreHK）
