噚日《ATF反恐》喺電視城開鏡拜神，見到司棋姐就諗起佢之前喺《真相》入面俾大口青逼佢影裸照嗰幕，俾人撕爛晒件衫，連胸圍都跌埋落地，幾十歲人仲要俾人蹂躪認真慘。
導演要求露一露
其實嗰集播完之後，好多網友群起討論，話套劇係史上最重口味嘅無綫劇，有人留言話：「TVB有乜要搞到咁重口味？」司棋姐噚日講番套劇都話好笑，佢話：「我都有朋友問我做乜咁激？問係咪除咗我個胸圍，我話冇！佢話個胸圍掉咗落地，我話我唔知，因為唔係喺我身上拉出嚟。所以我印象係冇咁嘅事。」
司棋姐講到露肉尺度，佢話：「係意識，其實都冇除我衫。導演問我邊度可以露一露，我話腳趾，佢都冇我符，佢咪話司棋姐手臂啦！」
另外無綫又有小生鬧不和，有傳無綫力捧陳展鵬惹吳卓羲不滿，同場嘅陳展鵬就話同吳卓羲係friend，陳展鵬話：「我之前唔識佢，合作之後大家變咗好兄弟。」吳卓羲就話會叫自己啲粉絲唔好激動，唔知佢會唔會因為有壓力發奮向上，唔再媾女管接管送？佢話：「都係嗰一次，不過我覺得外國藝人拍拖都係好正常，我自己都希望搵個結婚對象先公開。」