【鋒芝變之父子團聚】鋒芝婚變轟動全港，兩位主角謝霆鋒和張栢芝昨晚為離婚及兩子撫養權問題決戰陽明山莊，據悉二人仍未簽紙離婚。栢芝前晚突然出招提前於凌晨回港，計劃趕絕霆鋒搶子，然而霆鋒離婚心意已決，因拍戲搞到周身傷、造型滄桑的他昨午抵港後隨即會見律師，至晚上則由近百記者見證下直搗栢芝寓所講數，據悉霆鋒終於見到Lucas和Quintus，父子更耍樂嬉戲，他逗留約90分鐘後離開，並下榻金鐘一酒店，繼續與栢芝分居。
擾攘近兩個月的鋒芝婚變有突破性進展，鋒芝昨日先後返港正面交鋒。在寧波開拍《河東獅吼2》的張栢芝欲先發制人，有指她會託姊姊戴碧芝帶Lucas和Quintus出國，趕絕謝霆鋒搶子，故她臨時更改昨早返港的行程，前日在象山影視城收工後，漏夜搭內陸機經深圳轉車，並於凌晨1時20分返回陽明山莊寓所，靜候霆鋒來臨。
出招 律師共商大事
至於霆鋒昨在大馬通頂拍完《逆戰》煞科戲後，於下午二時許抵港，並即時坐車到他於銅鑼灣開設的製作公司，隨後其經理人霍汶希（Mani）到場；至5時三名律師到霆鋒公司，料與他洽商鋒芝離婚事項，經過兩個多小時會議後，換了衫的霆鋒由兩名男助手陪伴，由司機載他直搗陽明山莊與栢芝講數及探望兩子；他在7時半抵達，現場近百記者趨前拍照，護衞一度報警驅趕傳媒。
據悉霆鋒上樓後，終於成功見到Lucas和Quintus，久別的三父子耍樂嬉戲，而霆鋒也有跟栢芝商討家事。至9時05分，霆鋒在栢芝家逗留約個半鐘後便離開，驅車直往金鐘太古廣場的服務式住宅栢舍，他將黑超掛於頭頂，不發一言便入內，助手則為他拎行李篋及結他。今次霆鋒未有入住母親狄波拉名下物業，也未有像陳冠希般住高貴的四季酒店，寧願選擇簡約的apartment。
栢芝 下周轉戰上海
有指鋒芝已私下協議離婚，在財產分配及兩子撫養權方面均有共識，二人各得一子撫養權，他們昨傾談細節後，今日霆鋒會在港拍手錶廣告，栢芝明日則返寧波拍戲。《河》片投資方余毓興昨說：「栢芝認咗今次請假係同霆鋒處理一啲問題，希望可以同霆鋒當面解決。」據悉栢芝下周四會轉戰上海出席MiuMiu時裝騷及派對，同場還有郭晶晶及何超雲等。
鋒芝婚變轟動全港，霆鋒昨返港搶子，一早有過百記者在赤鱲角機場守候，英皇派出三名職員接機。瘦了又黑了的霆鋒昨紮辮、戴黑超及耳筒現身，留鬚渣現殘樣的他下唇有損傷兼有血迹，額頭及頸有紅痕，兩臂貼上三塊膠布，一身傷痕累累，他穿T恤捲袖、衫領被扯歪，cap帽掛股旁，造型滄桑，其間他雙手插袋，臉容chok住cool，但偶露笑容。
金句 我點樣走下去
霆鋒由安志杰及兩名助手陪同出閘時，記者一擁而上，問霆鋒回港是否處理婚姻問題？助手即擋駕：「之前講咗唔講呢啲問題。」霆鋒表現合作，掹開耳機聽記者發問，此時有記者引用霆鋒金句，問他知否將來要怎樣走下去？霆鋒幽默地說：「你哋擋成咁，叫我點樣走落去呢？」即如何處理？他不回應；會否擔心兩名囝囝？他細細聲答：「少少擔心。」他嘴唇受損，是否拍戲弄傷？他說：「係呀，啱啱拍完戲返嚟，嚟緊仲要拍廣告。」他返港後首要處理何事？他避談：「我講咗話唔講。」會否探望兩子？霆鋒說：「會呀。」但對離婚及撫養權問題概不作答。
採訪、攝影：張俊銘、楊浩賢、黃文偉、陳慧安
