近日娛樂圈不少藝人生BB榮升父母，喜事重重，日前郭晉安老婆歐倩怡誕下囡囡，昨日安仔出席活動時透露已為她取名郭以雅，希望囡囡長大後溫文爾雅。至於升呢為哥哥的兒子郭令山雖然只得3歲多，但已識得呷妹妹醋，刻意搞破壞變百厭仔博取注意。
郭晉安、徐子珊、吳卓羲和梁靖琪（Toby）等，昨日到銅鑼灣宣傳無綫劇集《團圓》，近日再添女兒的安仔談到囡囡近況，他表示已為她取名郭以雅，因為老婆歐倩怡想囡囡的名字較女性化，加上他們想囡囡長大後可以溫文爾雅，故此取這個名字。
「生多兩個唔怕」
但升呢為哥哥的兒子郭令山，卻因為妹妹出世而變成百厭仔，安仔說：「個仔識得妒忌妹妹，見到我哋留意妹妹多啲，佢就扭計同百厭咗，想引我哋嘅注意。」但囝囝又知道自己成為哥哥，突然拒絕包尿布和要一個人睡，令安仔和老婆哭笑不得。
問安仔會否偏心囡囡？他表示會盡量對仔女一視同仁，但現在難免對囡囡較為偏心和痛錫一點，安仔直言：「咁實際真係錫細嗰個多啲，因為佢家要人照顧。」會否考慮如曹永廉般結紮？安仔表示不會，他坦言自己有九兄弟姊妹，故此喜歡大家庭，他笑說：「生多兩個都唔怕，只怕愛心分唔勻，其他嘢都唔擔心，平有平養。」目前他休息陪老婆，9月才開工拍劇。
Toby年尾擺酒
此外，Toby已定於12月6日在尖沙嘴洲際酒店擺喜酒，筵開56席，因要籌備婚禮，又要兼顧在內地開新公司，故此很忙。Toby表示雖然56席中她佔去42席，但因朋友眾多，仍未能一一邀請，她坦言曾想開100席。
姊妹團方面，Toby透露：「有12個姊妹，包括湯盈盈、佘詩曼、唐詩詠、周家蔚同郭少芸等。」Toby直言揀晚裝和婚紗不能太性感，因未婚夫不喜歡。
採訪、攝影：張俊銘
