相信唔少人都有畀人放飛機經驗，如果畀人集體放飛機，感覺更加難受；曼城大軍周五就出發，準備為期約18日嘅美國之旅，不過多哥前鋒艾迪巴約等7人，就獲球隊行政管理馬活（BrianMarwood）嘅秘書通知，周六先返球隊練習，即係唔預佢哋去美國。艾迪巴約表面就大發牢騷，不過唔知會唔會因為唔使去比賽，而心中暗喜呢？
冇份隨隊赴美國集訓
曼城周五出發到美國進行集訓之餘，並進行3場友賽，對手有FC阿美利加、洛杉磯銀河等，點知艾迪巴約周三Checke-mail，先收到馬活嘅女秘書Claire通知，周六到球隊練習場報到，多哥球王就問一問其他隊友，有人話佢哋周五就出發去美國，聽到畀人遺棄，艾迪巴約當堂火起咁講：「曼城口口聲聲要打造世界最頂級球會，但佢哋一舉一動就唔係，冇人當面同我講，我感覺好傷害同好無禮。」
其實唔單係艾迪巴約被放飛機，冇份去美國嘅，仲有比拿美、辛達告魯斯、基雲、布歷治、奧奴夏同米高莊臣，其中愛爾蘭門將基雲都知道曼城不宜久留，下周將落實加盟阿士東維拉。不過我求大俠就覺得，艾迪巴約又唔使勞氣，呢十幾日同班失意隊友hea操就有人工，都不知幾爽；好似31歲嘅比拿美，同曼城仲有一年約，話之理冇波踢，照8萬鎊（約100萬港元）周薪，以艾迪巴約周薪有175,000鎊（約219萬港元），一日就有31萬港紙落袋，hea嗰18日有560萬，呢啲工係邊度搵？
曼城執19億球場冠名費
錢，對曼城絕對唔係問題；曼城剛剛就同阿聯酋國家航空（EtihadAirways）達成球場冠名贊助，為期15年總值1.5億鎊（約19億港元），即係曼城每年有1,000萬鎊落袋，打破阿仙奴04年接受阿聯酋航空15年1億鎊嘅球場冠名合約，成英超新高。
球會咁有錢咁浮誇，連球迷都感染埋；兩位曼城球迷將一架老爺雪鐵龍（Chevrolet）開篷車（圖），噴上曼城會章，兩旁又噴埋球場同泰維斯等球員，不過係曼徹斯特市揸一轉，會唔會畀曼聯球迷打爛呢？
