今屆港男將於下星期六（16日）進行比賽，前晚11位參賽者到鑽石山宣傳拉票，他們以密實look出現齋比試書法，睇頭大減，吸引力欠奉，難怪要出動咪神高海寧以低胸裝火併楊秀惠和朱慧敏。其中高海寧穿黑色谷胸吊帶裙，露出深長事業線，輕鬆撼贏楊秀惠和朱慧敏的微波身材。
一年一度的無綫《香港先生選舉》將於下星期六晚舉行，連日來11位參賽者頻頻亮相拉票造勢，前晚他們到鑽石山出席活動，即場比試書法，一眾港男以恤衫西褲出現，未有機會騷肌肉，睇頭大減，幸好有咪神高海寧、楊秀惠和朱慧敏以低胸裝亮相挽回睇頭。其中高海寧穿上黑色吊帶谷胸短裙，露出又長又深事業線，性感養眼，相反雖然楊秀惠和朱慧敏同樣以低胸裙亮相，但相比起高海寧只屬微波身材，明顯失色。
楊秀惠瘦咗冇胸
問到楊秀惠是否刻意穿低胸撼高海寧？她直言：「好多人話我瘦咗連胸都冇埋，咁點撼呀。」但為配合身上的低胸裝，楊秀惠仔細挑選合適內衣，她坦言很喜歡買內衣作不同配襯，她說：「如果揀啱內衣，會令身材更加好。」由於消瘦不少，楊秀惠要換過一批新內衣，此外又要做treatment保持雙峯堅挺以免下垂，會否請教高海寧？她直言：「梗係會，佢真係好勁。」高海寧則預告港男選舉當晚，由於有不少靚女同場，因此會更悉心打扮。
朱慧敏計劃結婚
名花有主的朱慧敏表示不喜歡太健碩的男士，男友身形均勻，她直言：「我叫過佢去選港男，佢有型又有身形，但佢拒絕咗。」感情穩定有否結婚打算？朱慧敏透露有計劃但並非短期內實行，不擔心男友被撬？朱慧敏笑言：「佢怕我俾人搶至真，雙方最緊要互相信任，一切順其自然。」現場見1號蕭家浩身形明顯消瘦，他坦言因為壓力大所影響。
採訪、攝影：王崇穎