李泳漢和泳豪是孖生兄弟，感情特別好，楊思琦上周二單方面在公開活動宣佈分手，失戀豪仔受創流下男兒淚，大孖泳漢直言因為心靈相通，絕對感受到胞弟的傷痛，泳漢昨日接受電話訪問時更踢爆思琦講大話。
「還細佬清白」
泳漢直言有睇過思琦前晚的剖白，睇到火滾的他昨日激動地說：「我想講紙係包唔住火，大家會有眼睇，我手頭都有證據，拎唔拎出嚟聽天尤命，當日思琦同細佬講有第三者，仲有埋BB先要分手。我希望佢可以為自己做嘅行為負責任，係佢自己選擇分手，但遇到有事就設計罪名加喺細佬身上，我心痛細佬俾佢心愛嘅女人誣衊同出賣，點解要佢食呢隻死貓。佢基本要出嚟承認有BB，有咗人哋個餡，唔好再講大話。」
有指思琦媽咪一早不滿意女尊男卑，很介意豪仔搵錢不及思琦多，泳漢即寸爆說：「話晒我哋都住九龍塘唔會失禮，佢呢9年同我哋住，豪仔對佢衣食住行照顧得好妥貼，仲有工人使，不過欲望嘅嘢就未必滿足得到，飛機、大炮同遊艇呢啲唔係照顧，希望佢分到。」
問到思琦與豪仔同居期間，可有倒貼李家，泳漢揶揄：「一毫子都冇，佢咁多年，過時過節一個月餅都冇買過番嚟。」泳漢表示所講的全是事實，他說：「我留緊情面畀佢，但佢一次又一次出嚟傷害我細佬，我咁講係想還細佬一個清白。」