近期香港政府對樓價高度關注，繼有復建居屋及限呎地等招數外，最近更出口術話十月施政報告有新房地產政策措施。基於上述政治環境，近期二手買賣合約急速煞車，尤以300萬元以下樓價俗稱細價樓，更有連環減價幅度5%-10%急插水現象出現，其中以新界區情況更加嚴重。
筆者近期跟各方地產代理界區霸好友溝通，大部份都表示近期地產代理二手樓非常難做，原因係細價樓嘅準買家，一遇上未有落實嘅政策出現，對於上車市民已經即刻打窒，嚇一嚇，已經意識到自己畢生嘅積蓄會唔會虧損，前線從業員表示有啲客人意願在未上車時更希望樓價跌而直接受惠，期待可以買平樓，而細價樓嘅業主好多時普遍嘅心態係賣唔賣都唔重要，因為細價樓嘅收租一般都有3厘或以上回報，如果做埋劏房6-10厘回報呢個係公開嘅事實，而中、高價樓宇換樓客因為受到近期收緊按揭問題，影響換樓嘅中產客提升起碼多20%首期，須知道市區3房700-800呎嘅單位樓齡唔超過十年，一般最少都要600-700萬。而首期多兩成付出多約200萬，某程度上在心理及實際環境的而且確有影響，而中高價嘅業主實力經過這幾年嘅升市，大把水位，財富效應水漲船高，就算做生意要周轉，基於現時銀行低息環境情況下，拎層樓去加按隨時套現一千幾百萬現金，試問中產業主咁有置業經驗，又怎會平讓單位，除非出現金融風暴或金融海嘯ORSARS，有嚴重嘅傳染病，市場係敵唔過大自然力量，筆者暫時看不到短時間內有以上情況，加上香港有110萬私人住宅單位，有超過6成以上係無按揭，近70萬業主手持現契，加上內地同胞支持，相信樓價會橫行拉鋸一段長時間，成交減少，那就苦了地產代理。
Email：mailto:[email protected]