如果說女人天生拜金，熊黛林（Lynn）又有否這個女人通病？在台灣偶像劇《拜金女王》，Lynn飾演拜金女王林楚曼的眼中只有錢；現實中，Lynn承認也愛名牌、名貴物品，但不代表她貪錢，恨釣金龜婿。Lynn自爆當年因在上海捱了半年即食麪，令她學懂珍惜所有，到現在有名有利，身邊還有個天王男友郭富城。雖然戀情講足5年仍未見天日，大家都為她心急了，但Lynn偏偏獨愛這份隱藏式的愛情，她笑說：「自己開心就得……拍拖、結婚都唔會特登宣佈。」 撰文：溫敏芝
來自南京的名模熊黛林06年來港發展不久，與天王郭富城拍廣告一吻定情，身價即暴升十倍，成為香港名模還不夠，再轉投大銀幕拍戲又拍電視劇，《葉問》裏的張永成令人對Lynn刮目相看，證明名模不一定是花瓶。
拜金中女迷惑闊少
最近Lynn首次擔正做女主角，在壹電視開拍的台灣偶像劇《拜金女王》中，飾演拜金中女林楚曼，她在機緣巧合下誤以為吳建豪是有錢仔，還使出渾身解數來迷惑他。Lynn就像劇中的林楚曼，年屆中女之列，同樣愛華麗的衣物，唯一分別是，她不會接納向錢看的愛情，她說：「我鍾意名牌、鍾意扮靚同名貴嘅嘢，但我唔贊成一個女仔為咗呢啲物質放棄自己嘅幸福，愛情唔使去到魚子醬好有錢，細個我都試過捱麪包嘅愛情，冇錢咪去平啲嘅地方囉。」
Lynn可說是一個傳統女人，憧憬結婚生仔，話說未完，她即笑道：「不過唔知幾時，以前會話28歲結婚，但家都到咗30歲，不過人生都想試吓生BB，咁先係完整人生。」一紙婚書，Lynn認為是重要的，是對大家的保障，一個男人肯為自己簽紙，是一種承諾。作為Lynn的另一半，又是否要步伐一致？她說：「又唔係諗住一齊，就想同你結婚，壓力好大嘛，對我自己壓力都好大，如果對方都有呢啲希望，都希望有個家庭，慢慢大家試吓，順其自然。」
逃避壓力保護戀情
與天王郭富城已公認為一對，戀情寫足5年仍未獲真正公開，會否擔心自己的將來？Lynn即如以往，用極高EQ避重就輕地答：「冇公認，哈哈，我自己將來唔擔心，我自己都有努力做嘢。」不想男友公開自己女友身份？她笑說：「又唔係嘅，自己開心就得，好多人鍾意寫微博，但我唔擅長同人分享，自己開心嘅嘢，唔係想咁多人知，人哋focus咗其他嘢，會令呢段關係更大壓力，拍拖、結婚都唔會特登宣佈，要知就知啦，家乜都好開心。」這個女人實在體貼。
一日三餐即食麪
Lynn來港發展一帆風順，事業、愛情兩得意，但曾幾何時也嘗過苦頭，99年19歲的她孤身從家鄉南京飛往上海發展，在上海做模特兒捱了幾年，日子十分艱苦，她說：「冇一個人一開始好順利，嗰時成個月得一個job，同個女仔share租屋，交完租剩番幾百蚊，邊夠使，仲要買衫同扮靚，試過坐車去試鏡得番幾十蚊喺身上，嗰時間屋又好細，只係擺到張床，廚房同廁所都轉唔到身。」年輕就是本錢，這幾年是難捱，但日子也過得快，她說：「嗰時仲細，冇錢咪買少啲食少啲，自己返去煮飯，一日三餐都食即食麪，六毫子一包，食咗半年，但係都覺得好好味。」一切都得來不易，Lynn會珍惜現在擁有，她說：「個天真係對我好好，06年嚟香港發展，真係冇乜挫折，遇到一個好好嘅經理人，我哋呢啲叫破釜沉舟，我都唔知點解當年自己咁大決心。」
劇情簡介：金錢vs愛情
壹電視開拍的台灣偶像劇《拜金女王》講述林楚曼（熊黛林飾）從小就知道社會現實，所以一直用「金錢就是一切」的觀念去做人，永不會花時間在窮男人身上的她，為了晉身上流社會，用盡全力維持自己的美貌和身材。
一次機緣巧合之下，林楚曼誤認小提琴手蔡家豪（吳建豪飾）是億萬富豪，於是用盡心計來接近他，但後來發現他竟是個家裏賣菜的窮小子。另一方面靚仔有錢的才俊嚴凱銘（陳曉東飾），本來做所有事都只是為事業的男人，但竟對楚曼動了真情，為她真誠付出，楚曼在愛情與金錢中會如何選擇？