開心飛起：火紅漢堡拉麪　麪餅夾拉麪日限10碟

如果講起九州霧島，大家可能只知道高千穗牧場同溫泉，但原來這裏暗藏隱世拉麪師傅，炮製一碗碗叉燒拉麪，今次我們就精挑三大特色拉麪店作終極對決，睇吓邊間至好食。

記者、攝影：李鑒泉
鳴謝：一田百貨

網上人氣爆燈　開業半年

雖然開業只有半年，但麪屋よしやす已經打響名堂，除在網上排行榜人氣爆燈，更有多間傳媒排住隊採訪。店主吉岡正智今年28歲，但已師承多位大師傅，最後獲母親用畢生積蓄資助開店。食材選料方面，他用當地生產的豬肉，肉質較腍身，配合母親調製的湯底，加上溫泉蛋一起食，層次豐富。午市套餐連秘製黑豚肉，將豚肉切成碎粒後，加上鹽粒一起烹調，送飯一流。鎮店之寶是每日限量供應10客的叉燒炒拉麪，叉燒和油炸大蒜夾在兩塊拉麪餅之中，如漢堡包。由於工序繁複，烹調時間長達半小時，以至每日只供應10客，吉岡先生指平日未開門就已有食客在門外等候，如果不預早致電預留，真是一客不留。

■吉岡先生唔識英文，於是用手機apps做即時繙譯！

■木無表情的侍應，一見小記舉機，即刻笑到見牙唔見眼。

叉燒炒拉麪$52
因吉岡先生每日只可做10碟，想食要趁早。

■拉麪套餐還會送泡菜。

■$12可另加一隻溫泉蛋，蛋黃真係溏心。

a.麪屋よしやす
地址：国分野口東3番40號
營業時間：11:00am至3:00pm、6:00pm至9:00pm
電話：（81）0995-452977

■麪屋よしやす開業只有半年已登上飲食龍虎榜三甲位置。

三代老號重口味　開業55年

在霧島市隨便問人哪間拉麪好食，他們想也不想就答是位於松下醫院對出的シくだ拉麪。店內裝修充滿六十年代風格，基本上由5歲至65歲的居民都會幫襯，店內總是人頭湧湧。唔講唔知，麪店已有55年歷史，老闆池田先生已經是第三代傳人，很多員工從他的父親年代已開始工作。為避免影響衞生，全店採用自動售賣機形式，食客投幣購買餐券後，店長才開始慢慢煮麪，湯底除用豬骨外，還有雞骨、柴魚，味道鮮甜。自家製招牌味噌散發陣陣香氣，且不覺油膩，多達十餘塊薄切叉燒略帶焦味，口感濃郁，加上設有多種份量可供選擇，女仔食中碼就剛剛好。好多食客食完甚至直接買拉麪回家自己煮，一盒5個只$52，夠晒經濟。

■所謂童叟無欺，連小朋友都大讚湯底香濃好味。

■份量分大中小3種，相中是大碗裝叉燒拉麪，約$89。

■連冷麪亦有推出手信版。

b.くだラ–メン
地址：隼人町真孝856
電話：（81）0995-435782
營業時間：11:00am至8:00pm

■隼人町的くだラ–メン，交通方便。

司機至愛抵食大件　開業33年

你有無見過成隻手掌咁大的叉燒？慶珉拉麪的叉燒以大見稱，且麪的份量是一般的兩倍，難怪成為貨車司機必食推介。由於鄰近國道及縣道，慶珉拉麪門外設大型停車場供貨車停泊，且由朝開到晚，幾時駕車到來也有熱辣辣的拉麪。雖然舖齡已33年，但店主仍不時搞搞新意思，定期推出限定拉麪，更有兒童餐，選擇多達20多款。採訪當日，熟客野村先生便和朋友專程來捧場，還異口同聲大讚湯底味道濃郁，叉燒又夠大塊，真是名副其實的抵食夾大件。還有，由黑豚肉炮製的餃子，表皮香脆，咬落肉汁四溢，6隻都只$35。

■慶珉拉麪有成隻手掌咁大的叉燒，幾乎佔據半個碗，約$77。

■司機野村先生（左）最鍾意慶珉選擇夠多。

■黑豚肉餃子肉汁四溢，6隻約$35。

c.慶珉（きょうみん）
地址：隼人町見次1256-1
營業時間：11:00am至11:00pm
電話：（81）0995-435533

■慶珉門口有大量車位，最啱司機前來搵食。

輕量級湯底清新　開業3年

湯底太濃不是人人鍾意，因此，鎌倉推出輕量版叉燒拉麪，入口時味噌湯底清新，叉燒份量唔算多，但入口即溶。若嫌食拉麪太dry，可試試當地特色年糕。主打的年糕及麻糬甜品套餐，有雪糕、紅豆、抹茶蛋糕及鮮果等，原本以為甜到膩，但入口卻感清新，很適合港人乜都想食的慾望。想要傳統一點，凍紅豆湯加年糕的的骰骰，女仔食多幾碗都唔怕肥。另外，每張枱枱面都有星座預測機，冧女一流。