記得facebook創辦人朱克伯格舊年底到訪中國，仲特登到訪祖國電訊一哥中移動（941），全球金融市場當時對兩家公司嘅合作充滿憧憬，殊不知一直無聲氣，直至近日，幾乎無官一身輕嘅中移動董事長王建宙接受內地媒體訪問嗰陣先至爆料，不過唔係爆公事，而係爆朱仔私隱！
帶埋朱女遊神州探中移
做得朱仔老竇嘅宙哥話，佢哋好好傾，咁具體傾過咩生意同傾成點梗係唔講得喇，但宙哥就高度評價朱仔！宙哥爆料話，朱仔當日係帶埋女朋友（即係朱女）一齊嚟嘅，嗰陣朱仔啱啱當選時代風雲人物，作為一個當紅嘅明星級人物，朱仔仲係好鬼謙虛，同電影裏面（即係《社交網絡》喇）見到嘅唔一樣，佢哋原本約咗3點鐘見面，點知朱仔兩點三就到咗，跟住就喺休息室裏面睇住書等。
除咗平和，朱仔另一樣嘢令宙哥印象深刻嘅，就係佢講得一口流利普通話！宙哥話，朱仔係成段中文咁講，至於點解要學中文，英文同樣頂呱呱嘅宙哥引述朱仔話，佢舊年八個月前決定十二月要訪問中國，所以就學中文，仲要係成段成段咁講嗰隻！所以話呢，成功，一定係有原因o架！話時話，宙哥英文素來laklak聲，嗰日唔知佢有冇露一手全程以英文回應朱仔呢又？
李華華
mailto:[email protected]