香港資源（2882）主席黃英豪同執行董事徐傳順畀廉記請飲咖啡單嘢，噚日可謂熱爆中環，事關一個係全國政協「新金王」，另一個係四叔李兆基嘅「千億親家」，兩位有頭有面又有錢，到底搞咗單咩嘢，搞到要去廉記？相信全個香港無人唔想八！
黃英豪冇返office
為咗同大家八第一手料，華華噚日孖住同事晨咁早9點正，就踩上黃生嘅office，諗住問個明白，不過無論係黃生爸爸嗰間黃乾亨律師事務所，抑或係香港資源嘅office，兩邊都話黃生唔喺度，香港資源嗰邊講到明黃生唔會返公司；至於啱啱抱男外孫嘅徐生，個手機一直都打唔通。
直至噚晚十點鐘，香港資源終於出聲明，話黃生同徐生協助廉記調查後，已經返公司正常工作。而呢單嘢同公司冇關，即係冇嘢可以八﹗
「調查與公司無關」
之不過咁，華華可以八住另一單鮮為人知嘅嘢畀大家聽嘅。
聽啲世叔伯講，好耐好耐之前，佢哋有個世姪，好想起支旗，一過上市公司主席癮。
但嗰陣世姪年紀仲係好細，一定要搵佢哋幫手，但由於世姪做事作風過份進取，加埋手法又有啲前衞（班老人家係咁講），所以，佢哋無人肯落叠，卒之，阿世姪喺若干年後，憑自己努力同埋同輩朋友幫手，先至完咗呢個夢……
李華華
mailto:[email protected]