洪天明、傅穎（Theresa）、賈曉晨（JJ）和林子善等，前晚喺將軍澳電視廣播城錄影節目《變身男女ChokChokChok》，洪天明最花心思，腳踏3吋高踭鞋加上化妝及手袋，妝扮「驚艷」萬分。
自言第一次着咁高高踭鞋嘅天明，自爆一身打扮都係女友周家蔚精心炮製，佢笑笑口話女友同佢扮靚時當正佢係細個玩嘅公仔，都唔知幾enjoy，天明話：「如果我呢個樣行出街會俾人打，俾人話妖孽，但女朋友見到就好開心，因為平時冇咁嘅機會。」
傅穎借衫變性
女扮男裝嘅Theresa戴咗個短假髮出現，不過佢冇紮胸上陣，男人婆效果未見成功，佢話原本想扮炎亞綸，但係因為身材唔夠高，所以就冇扮。Theresa自言一身服裝都係問朋友借，何韻詩借咗對鞋，葉文輝（啤梨）就借褲，不過馮仁昭質疑身形矮小嘅啤梨竟然可以借褲畀佢？Theresa即笑話：「佢買錯啫，自己打扮上嚟都似男仔o架，不過未試過有女仔追我，入行時自己都有啲rock味，都有好多女fans，但自己冇reject亦都冇accept囉。」