楊思琦單方面宣佈與李永豪分手後鬧至滿城風雨，昨日她在無綫節目開腔，思琦雖然一度泣不成聲，但言語間似是質疑李永豪生日當天設局「跣」她，又暗寸對方不能真正照顧到自己。至於盛傳她另結新歡兼懷孕，思琦否認懷孕之說，但揚言希望早日找到合適對象結婚生子。
楊思琦昨日接受無綫節目《東張西望》訪問，大談與拍拖9年的李永豪分手的感受。她強調兩人去年已有共識分手：「上年我哋感情上已經出現問題，到今年2、3月我正式搬離屋企。其實搬開都係諗住唔可以喺埋一齊，當時佢屋企人都在場，佢哋都會知係乜事。」說到兩人相處多時，分手應該不是倉卒決定，思琦忽然哭成淚人，要緩和情緒後才說：「家成熟咗，真係好想搵到一個真真正正可以照顧到自己嘅人。」
「留意身邊朋友」
至於問思琦何以分手後還出現在李永豪的生日會，她暗示有人放料說：「豪仔好想我去，作為朋友唔想佢唔開心。但冇諗過去到時有咁多傳媒喺度，如果知道我諗我未必會去。」她又指在會上聽到舊愛向傳媒稱兩人好事近感到十分愕然。提到盛傳她搭上AndyNg，她避忌地說：「其實我心情都好亂，我諗係時間留意吓身邊嘅朋友，希望盡快搵到照顧到自己嘅對象。」至於是否懷孕，她堅稱沒有，只強調希望盡快生仔，因有感自己年紀不小。
另一邊廂，受情傷打擊的李永豪落寞練拳，前晚約7時半，豪仔獨自到達拳館，看見師傅及師兄弟也毫無笑容，其師傅戴上手套陪他練拳，豪仔出拳下下大力，啪啪聲的似想將滿腔怒火打散，忘我地狂練兩小時。
永豪練拳忘情
豪仔謂多年來經常有打拳習慣，聲言自己情況OK，是否以工作及運動忘情？他說：「不嬲想自己處理番自己，賽車都會繼續，我8月會參加飄移比賽，會keep住練車。」但有指思琦之前不滿他賽車花錢，豪仔說：「之前解釋過，所有嘢係車隊負責。」問豪仔現在有否與思琦聯絡，他說：「我唔講呢個，想做好手上嘅嘢。」
採訪：張俊銘 攝影：林德雄