李泳豪難捨狠心舊愛楊思琦，父親李家鼎連日力撐兒子，對於思琦前晚接受無綫節目《東張西望》訪問，暗指遭豪仔出賣放料，安排記者5月時偷拍她陪豪仔出席生日飯局。李家鼎昨日在電話訪問誓神劈願，爆粗力證囝囝不是放料人，鼎爺說：「如果我個仔放料，我仆街死，我可以百分百證明豪仔冇放料，嗰時佢哋仲未分手。」
思琦與豪仔飼養多頭愛犬，思琦聲稱視愛犬為親生子女，不過她搬走卻沒帶走這班「仔女」，鼎爺說：「佢肯定唔要啲狗，一直以嚟啲狗都係豪仔打理，佢負責執屎執尿，思琦只係同啲狗玩，邊有照顧過。佢梗係想養夠一百隻，玩之嘛，不過我喝住，我同思琦講，你梗冇所謂，我個儍仔幫你照顧啫。」
「要幫佢企返起身」
鼎爺不滿思琦一腳踏兩船，說：「公道自在人心，我成日同豪仔講，佢屈到你咁，將來水落石出佢冇面。」有報道指豪仔曾表示願養女友與新歡暗結的珠胎，鼎爺即說：「如果個肚係拍拖前有咗，家同我個仔拍拖，講得清清楚楚，我會接受，但家事實唔係咁，我接受唔到，但豪仔真係咁做我一定唔高興，心裏都唔舒服。」
鼎爺估計豪仔最少一年才可撫平情傷，他說：「豪仔第一次拍拖，佢咁投入，仲計劃結婚，但偏偏整劑咁嘅嘢，我要幫佢企返起身，日日都勸佢放開啲。」
思琦新歡Andy一直玩龜縮，但卻有指他向豪仔發即將做爸爸的短訊示威，鼎爺鄙視Andy的行為冇品：「男人講呢啲嘢，真係差啲。」
鼎爺昨晚陪豪仔在尖沙嘴出席無綫劇集《拳王》煞科宴，提及思琦前晚在《東張西望》中連聲指不明李家為何如此，鼎爺火爆說：「係我唔明白佢，其實佢哋分手前幾日，佢先嚟屋企飲茶傾偈。」