高考放榜，狀元出籠，有四名六優生，來自沙田恒生商學院，另有十七名五優生，九名來自恒商。恒商固然教得好，但大家都知道，好多好多會考五A四A生，飲恨做唔到尖子（最少六A）提前入大學嘅，就會入恒商，希望「報仇」，而絕大部份參加高考嘅學生，都冇咗會考尖子做對手，故此入到恒商已經係奪A保證。一位六優女生李泳?最多照片見報，衣着十足日本妹妹，報紙話佢係動漫美少女，鍾意睇Cosplay喎，左丁山唔知係乜，問日本漫畫專家肥仔K，佢話呢類漫畫嘅粉絲，鍾意去買或自製漫畫人物嘅衣服，東京秋葉原街頭最常見，呢個係一個昂貴嗜好（一套水手服賣五萬日圓），冇錢就冇得玩，睇嚟呢位李同學應該係來自富裕家庭。
但清貧學生讀書，未必一定輸晒，十三名恒商六優五優生之中，有兩人住在公屋，一位三優生來自深水埗「劏房」，佢位家姐去年高考攞到三優二良入咗中大商科學院，可見事在人為嘅啫，窮學生最緊要勤奮過人。
每年啲狀元例牌選讀醫科、法律與商管，冇人要讀工程或理學院嘅，今年亦不例外，事實上，狀元多來自恒商嘅商科啦，已經自動放棄咗入讀工學院嘅資格（唔考物理，就已經難入工學院），此乃香港教育一大偏差。中學最優秀學生都讀理科，理科優異生就要在預科讀理科或商科，入到大學就全部唔讀理學院與工學院，搞到間間大學嘅理、工學院只能取錄高考成績D D，D E生（平均而言），但佢地嘅教授就不少係科學院、工學院院士，享譽國際嘅人物，可惜之至。
叻仔叻女在中學讀理科者，入讀大學理工科其實更容易入銀行（如果選讀大學商科嘅目的係為咗入金融界嘅話）。一間巨型銀行嘅高管在捐贈（中大）儀式時曾經透露，佢地銀行每年聘請工程科畢業生多過商科畢業生，又有咁啱，左丁山有四五個世姪女在呢間銀行工作，全部都係讀engine嘅。美國財富五百大公司嘅CEO升職軌道有跡可尋，多數係讀工科/電腦出身，再加一個MBA，甚少讀完BBA再讀MBA嘅，道理唔難明白，工科生加MBA就可以轉入商界，但BBA就未必容易讀多一個工科碩士學位。