曼城嘅阿根廷前鋒泰維斯係就係好波，不過好鬼麻煩囉。猶記得佢上季先扭話要走，估唔到日前又舊事重提，話為咗兩個女一定要離開，但問題係，曼城企硬話要佢用5,000萬鎊（約6.27億港元）嚟換番自己嘅自由，唔知邊間球會有咁多錢幫佢贖身呢？
嫌曼巿苦悶擺囡囡上枱
曼城喺新一季雄心萬丈，矢志挑戰英超同歐聯，點知俾隊長兼射手泰維斯一盤冷水照頭淋，公開要求離隊。泰仔喺聲明度話，好榮幸可以成為曼城一分子，亦好感激球會、球迷同老細蒙蘇對自己嘅照顧，但為咗兩個女，無奈決定離開曼城。佢咁話：「我希望啲人可以明白我嘅難處。我一個人喺曼徹斯特生活，真係唔易捱。我做任何嘢都係為咗兩個女姬蒂同費倫絲雅。我要同佢哋住近啲，同埋抽多啲時間陪佢哋。」
泰仔口口聲聲為對囡囡，但邊有咁偉大呀。記得喺舊年3月，佢同曼城申請放假返阿根廷，話要陪老婆雲妮莎生細女姬蒂，轉個頭就俾狗仔隊捉到佢同個模特兒去爆房。小道消息話，泰仔嫌曼市生活苦悶，於是擺家人上枱，等自己有藉口離隊，轉去夜生活多姿多彩嘅意大利或者西班牙落班。
天價人工亦成障礙
不過，西甲嘅巴塞隆拿同皇家馬德里都唔需要泰仔，意甲國際米蘭就同曼城傾唔掂數（國米希望用伊度奧交換）；更何況，曼城喺佢發離隊聲明後內部表態，只要有人擺低5,000萬鎊，佢就自由；但條數咁大，現今球壇除咗曼城自己，根本冇球會負擔得起；就算有，泰仔家喺曼城嘅周薪成28萬6千鎊，呢條數肯定嚇怕好多大會。泰仔想去西班牙、意大利或返阿根廷，晚晚攬女，除非佢有5,000萬鎊啦！
曼城喺泰仔扭計事件上表現精明，可惜買人嘅眼光就麻麻。日前佢哋落實以700萬鎊，同阿仙奴法國後衞基捷基治簽約4年。但係人都知，基治係阿仙奴防線最大漏洞，唔見得比曼城現有嘅左閘薩巴列達同布歷治好，所以我求大俠覺得領隊文仙尼入咗件次貨囉。
