蔡少芬（Ada）產後不足兩個月，昨日急不及待撇甩B女以靚媽姿態開工，除了上圍較過往升cup外，Ada身材依然弗到漏，還大讚老公張晉湊女有一手，無論換片、餵奶均一腳踢頭頭是道，比已為人母的她還要本事。
蔡少芬昨日在圓方商場出席渣打銀行推廣活動，Ada五月中才剖腹為丈夫張晉誕下女兒張楚兒（Zoe），昨日首度出席公開場合，身穿一件綠色連身裙，神采飛揚亮相，見她產後完全收身，以最佳狀態示人，Ada說：「對收身都好滿意，只係某一部位大咗啲，生仔幾有福氣，希望條腰可以再瘦啲。」
仍然餵母乳
Ada表示為了女兒健康，至今仍然餵母乳，Ada坐月期間，張晉曾取笑太太最緊要洗頭，Ada表示坐月間的痛苦已過，現時反而要捱眼瞓，她說：「凌晨要起身餵幾次奶，所以有咁好身形，同老公會分工合作，我好信任得過我老公，無論換片、餵奶佢都叻過我，好本事，又識個女瞓覺，我就越越精神。」
兩個BB撞衫
Ada現時決意以湊女為重，雖然會照樣工作，但暫時謝絕拍劇，還已經推了好幾部劇集，Ada笑言：「之前生女時已經屈咗好多親友畀利是我，係張家輝同吳啟華有迷信理論，話BB未出世唔可以畀，我之後就會追佢哋，啲利是錢我打算幫個女投資。」另外，姚瑩瑩早前誕下9.2磅巨B仔，昨日微博有人張貼Ada囡囡與瑩瑩囝囝的相片，只見兩人穿上同一款衣服，並留言：「第時可以對親家。」Ada則回應：「得你心水清。」
採訪、攝影：卓寶花