鄭秀文（Sammi）同許志安復合之後，雖然佢先後多次話要小心保護呢段戀情，低調進行，不過每次被傳媒問到有關戀情時，Sammi同安仔依然有問必答，表現大方。噚日Sammi喺尖沙嘴接受黃柏高主持嘅無綫生活台清談節目《Paco的風花歲月》訪問時，佢同Paco講唔好問咁多感情事，因為佢希望同安仔嘅關係可以平凡平穩咁發展。
「感情得來不易」
問Sammi係咪想小心保護戀情？佢大方直認，又透露曾經有婚紗公司搵佢同安仔拍廣告，但佢拒絕咗，記者笑話如果佢哋拍，將來結婚時會有贊助，Sammi聞言甜絲絲話：「有排呀，家段感情得來不易，我會小心保護。」
稍後Sammi又要離開香港兩個月拍杜琪峯嘅新戲，佢大發嬌嗔話好想延遲開工，因為想同安仔去行吓街相處吓。Sammi又大讚安仔：「佢樣樣嘢同生活上都叻過自己，但我做嘢就叻佢少少，不過因為我有7至8年冇拍拖，習慣咗獨立，所以家都要適應番兩個人嘅生活。」