大白天長洲好熱鬧，入黑人潮漸散，坐定定等喫海鮮。海旁一列大牌檔，風凉水冷就呃你嘅，但有無敵海景送飯，坐街邊夠風味，喫蠱惑墨魚丸隊大啤，飲飽食醉先坐船閃啦。
記者：徐務研
攝影：伍慶泉
Model：Phoebe
入黑大牌檔開餐！
坐街開飯夠風味
日頭長洲人來人往，滿街嬉笑聲，小食店有大班Fans自動波排隊，小朋友互相追逐，有人髮尾仲有餘濕，一睇就知剛剛享受完陽光與海灘，大男人們汗流浹背，剝上衫大晒六嚿腹肌或豬腩肉，熱鬧到不得了。入夜，長洲大街換上另一景象，以為人潮散去？No，仲未散Band！海旁一列大牌檔繼續熱鬧，對住無敵大海景，小情侶浪漫撐枱腳，一家大細則舉杯暢飲，人人吹水吹到口沫橫飛，High爆。
芸芸大牌檔中，Phoebe推介「新金湖」：「上次嚟長洲問過街坊，都話呢個海鮮檔最有水準，我幫襯過，價錢唔算超平，但勝在公道，一分錢一分貨嘛。」大牌檔有水缸養住海鮮，日日向漁民入貨，每有Order就即撈即煮，保證唔用雪藏貨，鍾意嘅，學Phoebe咁埋魚缸揀最靚海鮮啦。
漏餡芝心
事不宜遲開餐，Phoebe推介：「墨魚丸。」咁大路？有無搞錯？佢陰陰嘴笑叫我試味，嘩，勁彈牙，仲有熱呼呼芝士流出，「裏面有蠱惑o架！」原來係芝心墨魚丸，「絕對唔係凍肉舖一般貨色，用新鮮大墨魚人手打成。」果然無介紹錯。
一陣香氣傳來，原來係避風塘炒蟹，蟹仔細細估唔到勁多膏，啖啖甘香。大大隻椒鹽瀨尿蝦肉質鮮甜，連隔籬枱陳小妹妹都話：「最好味呢碟呀。」豉椒炒蜆食得多，有啲悶，今次嚟個胡椒鹹菜浸蜆，蜆肉飽滿先加分，鹹菜有助提鮮，味道不會喧賓奪主，好味到一滴不剩。想有飯入口，一定要試試招牌菜新金湖炒飯，即瑤柱蛋白地寶魚炒飯，地寶魚切碎粒炸香，配蛋白、鮮瑤柱同飯粒炒香，又係好味到照鏡嗰隻。豉椒炒蟶子係就係大路，但用料夠鮮保證你直豎拇指。特色小菜有乳鴒崧，乳鴿切碎後配冬菇等配料炒香，生菜搽海鮮醬包乳鴒崧一次過放入口，超正！
新金湖海鮮酒家（29810606）
長洲北社海傍路9號A地下