打麻雀三缺一已經夠擇使，阿仙奴周二新一季首次開操嘅大日子，一對主力法比加斯同拿斯尼雙雙失蹤，就更加擇使；曼城開張2,000萬鎊（約2.5億港元）轉會費同15萬鎊（187萬港元）周薪合約，睇怕拿斯尼都跟隨高路托尼、艾迪巴約、基捷基治步伐，由兵工廠投「城」嘞！
阿仙奴周二開操大日子，雖然唔見法比加斯同拿斯尼蒲頭，不過整體氣氛都幾融洽；好似因傷「唞」咗大半季嘅中堅華美倫，做帶頭大哥領操；從飛燕諾外借收回嘅日本翼鋒宮市亮，同科特迪瓦後衞伊保爾有講有笑，不過佢哋用英文、法文定日文交談，就不得而知。而阿仙奴今夏至今唯一收購、芬蘭後衞贊堅臣，亦都成為傳媒焦點。
曼城15萬鎊周薪引拿斯尼
阿仙奴會方冇公佈法比加斯同拿斯尼缺操原因，不過心水清嘅球迷都知道，呢兩位仁兄睇怕都會走頭；先講24歲嘅拿斯尼，佢同阿仙奴傾續約，講到牙軟都係想加到周薪11萬鎊，不過領隊雲格㩒住個荷包，只肯畀9萬鎊。
曼城有中東油王水喉射住，幾萬鎊邊放在眼內，即刻開到15萬鎊周薪畀呢位法國中場；如果成事，阿仙奴都唔算人財兩失，起碼可以收番2,000萬鎊轉會費。
巴塞為法比仔轉踢3-4-3
法比加斯之前一早講明唔會再返球會報到，亦都希望阿仙奴可以喺今個星期內賣佢去巴塞隆拿；之前有傳巴塞咁想買番法比仔，係想培育佢成為沙維接班人。
不過西班牙報章指，巴塞教練哥迪奧拿為咗法比仔可以打正選，甚至考慮改變打開嘅4-3-3陣式，改踢3-4-3，等法比仔可以同沙維、恩尼斯達同布斯基斯一齊合作，炮製一條西班牙黃金中場線，既然哥帥咁有誠意，點到法比仔唔心動。
如果兩人一如所料走人，其實雲格都可以收番6,000萬鎊，都算有子彈擴軍，最近就傳出阿仙奴想簽國際米蘭中場莫達，頂法比加斯；而傳咗好耐嘅里爾前鋒謝雲奴，據報亦等體測通過就成功入「廠」。