【鋒芝變之奇招突出】擾攘近兩個月的鋒芝婚變已進入白熱化階段，隨着後日謝霆鋒返港與愛兒團聚，爭仔戰將正面交手，不過開戰前夕兩人已各自發功，繼日前流出霆鋒遊澳門湊仔照後，昨日網上又流出一段栢芝帶Lucas參加聖誕party的親子片段，為爭兩兒撫養權各自炮製爭仔籌碼。
謝霆鋒和張栢芝的5年婚姻破裂已成定局，擾攘近兩個月，隨着後日霆鋒從大馬回港，身在寧波象山拍新片《河東獅吼2》的栢芝也密謀向劇組請假回港與霆鋒面談，盡力挽救婚姻。
親子同樂洋溢母愛
不過栢芝之前開腔狂數霆鋒，已令他心死，今次回港他將企硬。栢芝昨日不用開工只試頭飾，《河東2》投資方余毓興昨日在電話中表示仍未收到栢芝請假通知：「聽日一定會開工，會拍三場戲，栢芝第一場戲拍小沈陽，佢今日心情好輕鬆，仲同工作人員有傾有講，又分享Lucas同表姐玩嘅片段。」
由於鋒芝爭仔戰將陷入拉鋸，雙方陣營都積極備戰，栢芝日前開腔力數霆鋒是不負責任的爸爸，又在一號風球下自導自演親子大龍鳳，不過隨後網上即流出鋒芝舉家到澳門玩樂的照片，當時栢芝掛住玩手機，反而霆鋒享受湊仔樂，外間更狂插栢芝將照顧愛兒的責任交託給好友也不讓奶奶狄波拉照顧。
直到昨日網上忽然出現一段栢芝去年聖誕節帶Lucas玩樂的片段，栢芝與Lucas玩得十分投入，即使現場有不少家長和小朋友，栢芝也全程陪住Lucas玩遊戲。
現時鋒芝離婚只欠簽字，栢芝方面繼續死撐仍未收到離婚文件，網上昨日更盛傳鋒芝已簽字離婚，但據知兩人仍未簽字，又有傳媒指栢芝父親鬍鬚勇因不甘愛女被謝家欺負，即聯絡有關人士準備反擊霆鋒。
白韻琴提議拉姑湊
雖然一對兒子的撫養權仍屬未知之數，對此白韻琴昨日覺得Lucas和Qunitus應交由拉姑照顧：「最好畀嫲嫲湊，佢湊到仔女精乖伶俐，拉姑好有愛心，而且佢唔似個孫父母咁成日拍戲，流離浪蕩，畀栢芝更加唔好，佢屋企人太多，跟得多會心散，拉姑教仔女教得咁叻，你睇栢芝讀乜書？個官都會考慮呢樣嘢。」
此外，之前有意以一億港元簽栢芝三年的林建岳也即斬纜，據聞栢芝揚言以一蚊片酬拍向太的戲辣㷫岳少，喊停簽栢芝，栢芝演藝生涯認真危危乎。
採訪：葉雪