【本報訊】香港桌球迷夢寐以求的傅、李大戰泡湯！香港桌壇寵兒傅家俊（Marco）昨晚在尖東名將桌球會的國際盃分組賽，以4:5不敵世界排名比他高兩位的禾頓後，正好全身準備下周一泰國世界盃賽。
「火箭」明年來港
雖然Marco輸波，但不失為新一球季及世界盃做足熱身，國際盃搞手兼「名將」老闆黃日洪（圖）透露，明年的戲碼除好友傅家俊外，還包括「火箭」奧蘇利雲及新晉球壇「花花公子」鄧立普來港。今次約花了50萬港元主辦比賽的黃日洪，曾是90年代初香港代表，他說：「其實奧蘇利雲及鄧立普已答應我今年來港參賽，他們想要的賽期是本月15及16日，出場費都講好，約35萬港元（4人同行，包括二人的經理人），奈何遇上傅家俊在泰國打世界盃而撞期，只好放棄，明年一定會再叫兩人來。」黃生可以說對桌球壇有心有力，自04年已開始自資搞國際盃賽，賽事更不收門券，希望讓球迷有機會入場看比賽。
比賽方面，現時世界排名18的李爾昨日賽後說：「其實我還受到時差影響，比賽的波枱也比較快，希望明日能適應過來；但我好享受大批球迷到場睇比賽。」
至於Marco昨晚以4:5不敵世界排名20的禾頓，禾頓將於今午2時與李爾在11局6勝制的決賽中，爭奪冠軍。
《花絮》
向名將偷師
下周到加拿大蒙特利爾參加世青賽嘅兩名香港代表李士民（右一）及黃潤成（左一），噚日都有到場睇比賽。20歲嘅李士民坦言係嚟偷師：「主要想睇吓球手點處理臨場心理，我好欣賞李爾，佢雖然好大隻，但出cue嘅力好柔，控制個波好好，好想學佢。」世青賽嘅港隊成員仲有陳銘東。
禾頓賺外快
好少見世界排名20嘅禾頓（RickyWalden、圖）着住短褲打桌球吧！呢位英超利物浦球迷噚晚喺香港無事忙，出錢搞比賽嘅黃日洪先生就叫佢同香港一啲年輕球手打讓分賽，勝方可得2,000蚊獎金，禾頓話晒都係上屆（09年）呢項比賽嘅冠軍球手，當然冇托手踭啦！佢嘅讓分係35度同40度，最後一場贏一場輸，都賺咗少少「零用」。
枱上的「波兒」
桌球壇肥仔李爾（StephenLee、圖），比賽時一向成個肥波波瞓喺波枱上！呢位英格蘭球星冇嚟香港接近10年，今次見佢好似仲肥咗，問佢使唔使減肥，佢諗都唔諗就話唔需要。再問佢家有幾重，就照例唔肯講，但就話比起10年前嚟香港時冇乜分別，喺比賽時仍然活動自如。李爾亦透露每日都會喺體能室做半小時運動，你信唔信？
